په ایران د امریکا او اسراییلو له ګډو هوايي بریدونو او په منځني ختیځ کې د کړکېچ له زیاتېدو سره سم، یو شمېر هېوادونو فضایي حدود تړل شوي چې له امله یې د افغانستان له فضايي حریم تېریدونکو ملکي الوتکو په شمېر کې زیاتوالی راغلی.
د ټرانسپورټ او هوايي چلند وزارت وايي، د افغانستان له فضايي حدودو څخه د تېریدونکو الوتکو په شمېر کې دا زیاتوالی له تېرو څو ورځو راهیسې راغلی.
د دې وزارت ویاند زیاته کړې، د افغانستان فضايي حدود د ملکي الوتکو د تېرېدو لپاره تر ټولو خوندي لیکې دي.
حکمت الله اصفي ډاډ ورکړی چې د هېواد په ټولو هوايي ډګرونو کې مسافرینو او د الوتنو لپاره ټولې لازمې اسانتیاوې برابرې شوې او دا هڅې لا هم روانې دي.
د ټرانسپورټ او هوايي چلند وزارت ویاند حکمت الله اصفي وايي: « د افغانستان پر فضا د تېرېدونکو الوتکو شمېر وخت نا وخت د تغییر په حال کې دی، کله کمېږي او کله زیاتېږي. دا مهال د عبوري الوتکو په شمېر کې زیاتوالی راغلی. موږ ټولو ملکي هوايي شرکتونو ته ډاډ ورکوو چې کولی شي د افغانستان فضا انتخاب کړي. همدارنګه بیاهم هوايي شرکتونو او مسافرو ته ډاډ ورکوو چې د افغانستان له ټولو هوايي ډګرونو څخه پر وخت او مناسب خدمات وړاندې کېږي. ټرانسپورټ او هوايي چلند وزارت تل هڅه کوي چې د واټ ټرانسپورټ ترڅنګ د هوايي چلند په برخه کې هم لازمې اسانتیاوې رامنځته کړي.»
د افغانستان جیوپولټیک موقعیت ته په اشارې، کابل اوس د منځنۍ اسیا، جنوبي اسیا او خلیجي هېوادونو ترمنځ د یوې فضايي څلور لارې په توګه رول لوبوي.
ځینې شنونکي په دې باور دي چې د افغانستان له فضايي حدودو څخه د تېرېدونکو الوتکو په شمېر کې زیاتوالی د حکومت په عوایدو کې د زیاتوالي سبب هم ګرځي.
د اقتصادي چارو کارپوه عبدالنصیر رښتیا وايي: « کله چې د افغانستان له فضا څخه د الوتکو تګ راتګ زیاتېږي، په لومړي ګام کې د دې سبب کېږي چې د حق العبور له درکه د افغانستان ملي عواید زیات شي. د عوایدو په لوړېدو سره به حکومت وکولی شي چې په خپلو هوايي ډاګرونو کې پراختیايي پروژې پلې او هوايي ډګرونه د هوايي چلند په عصري وسایلو سمبال کړي.»
په ورته مهال، ځینې نور شنونکي بیا د افغانستان په فضايي حدودو کې د ملکي الوتکو د ټرافیک زیاتېدل د اقتصادي ګټو ترڅنګ، دا هم واضېح کوي چې د افغانستان حالت باثباته او خوندي دی.
د اقتصادي چارو کارپوه یونس ځدراڼ وايي: « د هر هېواد پر هوايي حریم چې کومې الوتکې تېرېږي، هغه هېواد ته امتیاز او حق العبور ورکول کېږي. دا د افغانستان لپاره ګټور تمامېږي او عواید یې لوړوي.»
د ورکړل شویو معلوماتو له مخې، تېر ۲۰۲۵ میلادي کال کې چې د ایران او اسراییلو ترمنځ ۱۲ ورځنۍ جګړه وشوه، هغه مهال هم د افغانستان په فضايي حدودو د الوتکو ټرافیک زیات شوی و.
