د افغانستان سولې لپاره د امریکا پخوانی استازی د کابل او اسلام اباد ترمنځ روانې شخړې ته په اشارې وايي، د پاکستان د خلکو او پوځي رژیم ترمنځ واټن مخ په زیاتېدو دی.
زلمي خلیلزاد په افغانستان کې د ملکي وګړو مرګ ژوبلې په اړه د ملګرو ملتونو استازولۍ(یوناما) مستند شوي راپور ته اشاره کړې او وايي، د پاکستان پالیسۍ د ملکي وګړو د مرګ ژوبلې سبب ګرځي.
خلیلزاد زیاته کړې، باور نه لري چې د پاکستان خلک د خپل حکومت له هغو پالیسیو ملاتړ وکړي چې افغانستان کې د ملکي مرګ ژوبلې لامل کېږي.
خلیلزاد وړاندې لیکلي: « زه باوري یم چې د پاکستان عام خلک له هغې پالیسۍ ملاتړ نه کوي چې په کې ملکیان په نښه کېږي. دا چې د پاکستان هوایي بمباردونو کې د افغان ملکیانو په نښه کېدل مستند شوي، له امله یې د پاکستان حکومت او خلکو ترمنځ واټن په ډېرېدو دی.»
بل پلو، تېره ورځ د هند نامتو عالم مفتي سلمان احمد ندوي د افغان حکومت له لوري د پاکستاني پوځي رژیم پوځیانو پر وړاندې غچ اخستونکي اقدامات فرض عین بولي او دا یې د حق او باطل ترمنځ جګړه یاده کړې.
د پاکستان خبریالان بیا د پاکستان او افغان حکومت موجوده ترینګلتیاوو ته په غبرګون کې د اسلام اباد اوسنۍ تګلاره ناکامه بولي او دوام یې د پاکستان لپاره لویه تېروتنه ګڼي.
د پاکستان ازاد خبریال طاهر خان وايي: « په پاکستان کې هم ښه حالت نه دی او دلته هم ستونزې شته؛ د دې ځای خلک هم امن غواړي. د پاکستان او افغانستان خلک، حکومتونه او ولسونه په دې ښه پوهېږي؛ د دې په ځای چې خلیلزاد ورته وايي چې دا وکړئ او هغه مه کوئ.»
له دې مخکې د پاکستان سیاستوالو هم د افغانستان پر وړاندې د پاکستان پوځي رژیم له خوا د زور کارول د اسلام اباد په زیان بللي وو.
دوی د پاکستان له پوځي رژیم غوښتنه کړې چې له کابل سره د تقابل پر ځای، معنا دار تعامل ته مخه کړي.
افغان کارپوهان وایي، د پاکستان پوځي رژیم اوس مهال له سخت ناورین څخه تېرېږي او په خبره یې، اسلاماباد اړ دی چې په پاليسيو کې د تقابل په ځای، تعامل او ډېپلوماسۍ ته ځای ورکړي.
د پوځي چارو کارپوه اخترمحمد راسخ وايي: « د دې جګړې اثرات به پاکستان له تجزیې سره مخ کړي، بلوڅ بېلتون پالي او د پاکستاني طالبانو غورځنګ به بریالي کېږي او د افغانانو اشغال شوې خاوره به آزادېږي.»
د پوځي چارو کارپوه اسدالله ندیم وايي: « دواړو طرفونو ته لازمه ده چې پر خپلو پالیسیو بیا کتنه وکړي او د هر هېواد ملي ګټو او د مخالف هېواد ګټو ته په متقابل درناوي سره، خپل سیاسي مسیر انتخاب کړي.»
د سې شنبې په ورځ د اسلامي امارت مسوولینو کابل کې خبریالانو ته وویل، د پاکستان له پوځي رژیم سره جګړه هېڅکله د افغان حکومت انتخاب نه و، خو د تېري پر وړاندې له خپلې خاوری دفاع خپل حق بولي.
د حکومت مرستیال ویاند حمدالله فطرت دغه راز وویل، په کابل کې د پاکستان د سفارت تړلو په تړاو لاهم د پرېکړې کولو وخت شته دی، خو په خبره یې، دا موضوع تر غور لاندې ده.
