په افغانستان کې د اسلامي امارت له لوري له شپږم ټولګي پورته د نجونو ښوونځيو د بندیدو په تړاو د نړیوالو غبرګونونو پر دوام، تازه د بښنې نړیوال سازمان د ښځو زدهکړې سرې کرښې یادې کړي او د اسلامي امارت دغه پریکړه یې د جنسیتي تبعیض اجنډا برخه بللې ده.
یاد سازمان له نړیوالې ټولنې هم غوښتي دي،چې د فشار په توګه دې له اسلامي امارت سره د مذاکراتو پر مهال د نجونو زده کړې اړینې وبلل شي.
د بښنې نړیوال سازمان وايي:« د بښنې نړیوال سازمان پر نړیواله ټولنه غږ کوي،چې له طالبانو سره په مذاکراتو کې د نجونو او ښځو حقونه د سرو کرښو په توګه یادې کړئ. طالبان باید پرته له کوم ځنډه، د ټولو ټولګیو ښځینه زدهکوونکو ته د زده کړو اجازه ورکړي. هغوی دې له تبعیض ډکې اجنډا ته نورې پلمې نه جوړوي.»
بل لور ته د اروپايي ټولنې بهرنۍ پالیسۍ مشر جوزیپ بورېل هم د اسلامي امارت دا پریکړه غیر عادلانه یاده کړې او د ښوونځيو تړل یې د ښځو له اساسي حقونو سرغړونه بللې ده.
بورېل زیاته کړه:« هېڅ دین او ټولنیز اصل د دې لامل کیدای نه شي،چې دا ډول غیر عادلانه چلن توجیه کړي. دا د ټولو ماشومانو لپاره د مساوي زده کړې له اساسي حقه ښکاره سرغړونه ده.»
بورېل وايي، د اسلامي امارت دا پریکړه به د دوی ترمنخ پر اړیکو منفي اغیزې ولري.
هغه زیاتوي:« د طالبانو حکومت په دې کار سره د خپل کورني مشروعیت فرصتونه او د نړیوالو ترمنځ خپل باور له لاسه ورکوي. که طالبان پر خپله پریکړه له سره غور و نه کړي، نو دا به د اسلامي امارت او اروپايي ټولنې ترمنځ د تعامل په برخه کې هم ډېرې منفي پایلې ولري.»
