په داسې حال کې چې په سیمه کې د ایران، امریکا او اسراییلو ترمنځ د روانې جګړې پراخېدو په اړه وېره په زیاتېدو ده، د افغانستان بهرنیو چارو وزیر د سملاسي بندولو او د شته ستونزو هوارولو لپاره ډيپلوماټیکو چینلونو ته د ورګرځېدو غوښتنه کړې.
د بهرنیو چارو وزارت مرستیال ویاند وايي، د بهرنیو چارو وزیر له خپل ایراني سیال سید عباس عراقچي سره په یوه ټلیفوني اړیکه کې د سیمې پر حالاتو ژوره اندېښنه څرګنده او پر ایران یې د امریکا او اسراییلو تیری غندلی.
ضیا احمد تکل زیاته کړې، مولوي امیرخان متقي د ایران د مذهبي مشر د ژوند بایللو او د روانې جګړې د نورو قربانیانو په اړه خواخوږي او تسلیت هم وړاندې کړي.
د بهرنیو چارو وزارت مرستیال ویاند ضیا احمد تکل وايي: « په دې مکالمه کې چې د افغانستان اسلامي امارت د بهرنیو چارو وزیر مولوي امیر خان متقي او د ایران د بهرنیو چارو وزیر ډاکټر سید عباس عراقچي ترمنځ وشوه، د سیمې د وروستیو حالاتو او اوسني وضعیت په اړه خبرې وشوې او نظرونه شریک شول.»
د بهرنیو چارو وزارت مرستیال ویاند زیاته کړې، د ایران بهرنیو چارو وزیر بیا د افغانستان د دریځ د ستایلو ترڅنګ، د منځني ختیځ د حالاتو، د امریکا او اسراییلو له خوا پر ایران د یرغل او د ایران د ځوابي اقداماتو په اړه تفصیلي معلومات وړاندې کړي.
د افغانستان او ایران بهرنیو چارو وزیرانو دا خبرې داسې مهال کړې چې د ایران، امریکا او اسراییلو روانې جګړې په درېیمه ورځ هم امریکا او اسراییلو پر ایران او په سیمه کې د هغه پر متحدینو بریدونو ته دوام ورکړی.
په داسې حال کې چې اسراییلي جېټ الوتکې د ایران د پلازمینې تهران په فضا کې ګرځېدلې، ایران بیا په فارس خلیج کې د امریکا پوځي اډې او اسراییلو باندې د ډرون او میزاییلو بریدونو ته دوام ورکړ.
له بلې خوا، په لبنان کې د حزب الله له خوا هم پر اسراییلو د توغندیو بریدونه شوي چې په ځواب کې یې اسراییلو د بیروت پر شاوخوا سیمو کې د حزب الله مرکزونه په نښه کړل.
په روانه جګړه کې د نورو اړخونو ښکیلتیا ته په اشارې دا وېره څرګندیږي چې ممکن روانه جګړه په بشپړ ډول په یوه سیمه ییزه جګړه بدله شي.
نیویارک ټایمز ورځپاڼې په دې اړه د راپور په خپرولو سره لیکلي: « په داسې حال کې چې ایران په خلیجي هېوادونو کې د امریکا پر پوځي اډو د ډرون او میزایلو بریدونه کول، په کویت، قطر او متحده عربي امارتو کې د سترو چاودنو غږونه واورېدل شول. ایراني مشرانو وویل چې دوی په سیمه کې د امریکا تاسیسات په نښه کوي، خو دوی په ورته وخت کې د دوبۍ نړیوال هوايي ډګر، هوټلونه او نور ملکي تاسیسات هم په نښه کړل. د چارواکو په وینا، د شنبې ورځې راهیسې په خلیجي هېوادونو کې لږ تر لږه شپږ کسان وژل شوي دي.»
همدارنګه د دوشنبې په ورځ د ایران، امریکا او اسراییلو ترمنځ بریدونو په دوام، د کویت دفاع وزارت وویل چې په خاوره کې یې څو امریکايي جټ الوتکې غورځېدلې دي.
د کویت دفاع وزارت که څه هم د غورځېدلو جېټ الوتکو شمېر ونښود، خو ویې ویل چې د غورځېدلو الوتکو پیلوټان ژوندي دي.
په روانه جګړه کې چې د شنبې په ورځ پر ایران د امریکا او اسراییلو د ګډو هوايي بریدونو سره یو ځای پیل شوه، تر اوسه شاوخوا ۶۰۰ ایرانیانو ژوند بایللی او سلګونه نور ژوبل شوي دي.
په ورته مهال، امریکايي ځواکونو هم ویلي چې تر دې دمه څلور پوځیان وژل شوي دي.
ټرامپ خبرداری ورکړی چې په ایران د ټاکل شویو اهدافو ترلاسه کولو پورې به دا بریدونه دوام وکړي.
د ټرامپ دې خبرداري ته په اشارې، سیمه ییز شنونکي وېره لري چې ممکن په روانه جګړه کې د نورو اړخونو د شاملېدو زمینه هم برابره او درېیمه نړیواله جګړه پیل شي.
