د هرات اور وژنې یا اطفایې مدیریت مسوولین وایي، د روان کال په جریان کې یې ۴۱۶ بېلابېلو پېښو ته رسېدنه کړې.
د دوی په خبره، یادو پېښو کې ۴۰۹ د اورلګېدنې، ۵ پېښې څاه ته د لوېدلو او یوه پېښه هم د کور چت پرېوتلو وه چې پر وخت رسېدنه ورته شوې او د ډېرو زیانونو اوښتو مخنیوی شوی.
د هرات اطفایې مدیریت مطبوعاتي مسوول بشیر احمد واحدیار وايي: « د ۱۴۰۴ کال په اوږدو کې موږ وکولی شول چې ۴۱۶ پېښې چې له ډلې یې ۴۰۹ پېښې د اورلګېدنې، پنځه پېښې څاه ته د لوېدلو او یوه پېښه هم د کور نړېدلو وه چې ټولټال ۴۱۶ پېښې کېږي، مهار کړو او د اور له خپرېدو او زیاتو زیانونو اوښتو مخنیوی وکړو.»
مسوولین دغه راز زیاتوي، تېرو دوو میاشتو کې د اور وژنې شپږ عرادې وسایط او یو شمېر نور اړین وسایل هم ترمیم شوي او ورسره د اور وژنې ټیم ظرفیت نور هم لوړ شي.
د هرات امنیه قومندانۍ ویاند احسان الله حسین وايي: « دا ډېر د خوښۍ ځای دی چې زموږ د اطفایې مدیریت په تېرو دوو میاشتو کې له تېر نظام څخه راپاتي خراب وسایط ترمیم او ګټه اخستنې ته سپارلي. د دې ترڅنګ، د اوکسیجن ماشینونه او ځینې نور اړین ماشین آلات هم ترمیم او ګټه اخستنې ته چمتو شوي.»
که څه هم د اطفايې مدیریت د وسایطو له ترمیم سره ډاډ ورکوي چې پېښو ته به يې رسېدنه ډېره او د زیانونو مخنیوی به کم شي، خولا هم پر سړکونو له ګڼه ګوڼې شکایت لري او له ښاریانو همکارۍ غوښتنه کوي.
د هرات اطفایې مدیر عبدالله صدام وايي: « کله چې په کومه ساحه کې اور لګېدنه رامنځته کېږي، که له موږ سره د مخابرې له لارې اړیکه وشي یا په ښار کې زموږ د نوکریوالۍ په ټیلفوني شمېره اړیکه ونیول شي، موږ به ځان ورسوو. موږ له ښاریانو غوښتنه کوو چې د اور وژنې او اطفایې موټر ته لاره ورکړي، ترڅو په وخت ځان ورسوي او له مرګ ژوبلې مخنیوی وکړي.»
د هرات اطفایې کارکوونکی امید مرادي وايي: « خلک له موږ سره د بندو سړکونو په خلاصولو کې همکاري نه کوي. موږ له خلکو او موټر چلوونکو هیله لرو چې د اطفایې موټر په لیدلو سره لارې خلاص کړې. اطفاییه د خلکو ژغورنې لپاره ځي او باید په ډېره چټکۍ ځان ورسوي. نو خلک باید ورسره همکاري وکړي.»
د مسوولینو د معلوماتو له مخې، په روان لمریز کال کې یادو پېښو ته د رسېدنې پرمهال د ۱۶ کسانو ژوند ژغورل شوی او د یو میلیارد افغانیو سوځېدو مخه هم نیول شوې ده.
