د سیاسي چارو یو شمېر کارپوهان بیا په دې اند دي،چې د نجونو ښوونځیو د پیل ځند د دې لامل شوی دی، د افغانستان او نړیوالو ترمنځ اړیکې اغیزمنې کړي او امریکا متحده ایالتو هم په غبرګن کې د واشنګټن او کابل ټولې هغه ناستې چې ټاکل شوې وه،په دوحه کې ترسره شي، لغوه کړې دي .
ځینې بیا په دې باور دي،چې له چین او روسیې سره د اسلامي امارت وروستۍ راشه درشه او نږدې والی د واشنګټن د نارضایتۍ لامل شوی دی .
پخوانی دیپلومات عزیز معارج وايي:« د افغان نجونو د ښوونځیو نه پیل کیدل نه یوازې پر کوردننه افغانستان ته زیان رسوي،بلکې له افغانستان سره د نړیوالو پر اړیکو به هم زیات اغیز وکړي، په تیره بیا سیاسي او اقتصادي چارو کې لکه څنګه،چې امریکا غوښتل نن له طالبانو سره په دوحه کې پر اقتصادي چارو د نويو پیسو پر چاپ او بانکي چارو د حل لارو په لټولو خبرې وکړي،هغه لغوه شوې او همداسې نړیوال به هم نورې خپلې مرستې نه کوي.»
کارپوهان وايي،د نجونو د ښونځیو د دروازو تړل د افغانستان پر کوردننه او بیرون منفي پایلې درلودې، خو نړۍ ته پکار ده،چې له اسلامي امارت سره نږدې تعامل ولري او سرپرست حکومت هم باید د خلکو او د افغانستان راتلونکي په تړاو فکر وکړي.
د ولسي جرګې پخوانی غړی کمال ناصر اصولي وايي:« ولې له امریکا سره مذاکرات لغوه شول،ددې لپاره چې ټول پوهیږي، د افغانستان خلک د خپلو لوڼو لپاره تحصیل غواړي او دا یو اسلامي هېواد لپاره لازم دی او د نجو نو د ښوونځیو د دروازو تړلو تصمیم افغانستان لپاره زیات منفي تمام شو.»
ځینې بیا وايي،امریکامتحده ایالت د اسلامي امارت کندهار ناستې ته زیاته هېله منده وه،خو هغه څه چې له دغې ناستې راوتي،دامریکا د میل خلاف دي.
د سیاسي چارو کارپوه سرور نیازی وايي:« د کندهار له غونډې سره جوخت هم په افغانستان کې د نجوونو مکتبونه وتړل شول او هم امریکایانو خپل مذاکرات له طالبانو سره پرر ټپه ودرول، داسې ښکاري،چې امریکایانو له دغې ناستې هېلې درلودې،چې ناامیده شول او خپل مذاکرات یې له طالبانو سره لغوه کړل.»
ټاکل شوې وه،چې شنبه او یکشنبه د اسلامي امارت یو پلاوی په دوحه کې له امریکايي لوري سره پر اقتصادي مسایلو بحث ولري،خو امریکا چې خپلې ناستې یې لغوه اعلان کړې،د اسلامي امارت پلاوي هم قطر ته خپل سفر لغوه کړی دی.
