امریکا دوحه کې له اسلامي امارت سره کېدونکې خبرې لغوه کړې

د امریکا متحده ایالتو د بهرنیو چارو وزارت کې  یوې سرچینې رویټرز خبري اژانس ته ویلي، د افغانستان لپاره د امریکا ځانګړي استازي ټوماس وېسټ پر مشرۍ په دوحه کې له اسلامي امارت سره کېدونکې خبرې لغوه کړي دي. 

رویټرز خبري اژانس وایي،امریکا په قطر کې د افغانستان بانک، د افغاني بانکنوټونو د چاپ او د افغانستان د تعلیمي سیکتور لپاره د نړیوال بانک د سلګونو میلیون ډالرو مرستې په اړه له اسلامي امارت سره د خبرو پلان لغوه کړی دی.

د دغو خبرو لپاره د ټوماس وېسټ تر څنګ د افغان ښځو او نجونو د حقونو لپاره د امریکا متحده ایالتو ځانګړې استازې رینا امیري هم دوحې ته تللې وه.

امریکا وروسته له هغه د دې کتنو لغوه کولو پرېکړه کړې،چې اسلامي امارت له شپږم ټولګي پورته د نجونو پر ښوونځیو بندیز وغځاوه. 

ټاکل شوې وه ، چې قطر کې شنبه او یکشنبه امریکايي استازو له اسلامي امارت سره د مهمو اقتصادي مسایلو په ګډون پر ځینو موضوعاتو بحثونه کړي وای.

رویټرز خبري اژانس د امریکا د بهرنیو چارو وزارت د یوې سرچینې له قوله ویلي، هغه قطرۍ الوتکه چې ټاکل شوې وه ،کابل ته راشي او د اسلامي امارت د بهرنیو چارو وزیر امیر خان متقي پر مشرۍ پلاوی دوحې ته یې ولېږې، کابل ته نه ده را استول شوې.