اسلامي امارت پر افغانستان د پاکستان پوځي رژیم وروستی تېری د هغې پروژې یوه برخه بولي چې اسلام اباد د سیمې نا امنه کولو لپاره اخستې ده.
د اسلامي امارت ویاند ذبیح الله مجاهد وايي، د پاکستان پوځي رژیم د خپلو بادارانو خوشاله کولو په موخه، افغانستان کې ملکي وګړي په نښه کوي.
مجاهد له شمشاد ټلویزیون سره ځانګړې مرکه کې وايي، په ننګرهار او پکتیکا ولایتونو کې د پاکستان پوځي رژیم وروستی جنایت به چې په کې لږ تر لږ ۲۴ ملکي وګړي شهیدان شول، بې ځوابه پاتې نه شي.
د افغانستان اسلامي امارت ویاند ذبیح الله مجاهد وايي: « دا اوسنۍ سیاست هم د هغې کړۍ کار دی چې له افغانستان سره یې د دښمنۍ لاره نیولې او له سیمې سره د بې ثباتۍ په پروګرام کې ښکېله ده. دا کړۍ د سیمې له هېوادونو سره د تنش په لور روانه ده او د لویو هېوادونو د پروژو پر عملي کولو بوخته ده.»
مجاهد وړاندې په خپلو خبرو کې وايي، د پاکستان پوځي رژیم پر افغان خاورې بریدونو سره د خپلو ناکامیو پټولو هڅه کوي، خو دا جنایت به هېڅکله پټ نه شي.
د اسلامي امارت ویاند د یوې پوښتنې په ځواب کې وايي، ډېر ژر به د پاکستان پوځي رژیم بریدونو ته په مناسب وخت کې حساب شوی ځواب ورکړل شي.
د مجاهد په خبره، دا ځل به د افغانستان غبرګون د پاکستان پر پوځي اهدافو متمرکز وي.
د افغانستان اسلامي امارت ویاند په دې اړه وايي: « د دې د مخنیوي هڅه شوې؛ دوی ډېرې هڅې وکړې او د داعش له پدیدې یې ګټه واخیسته، ترڅو افغانستان نا امنه کړي. کومې وسلې چې افغانستان ته رالېږل شوې وې، ښايي دا به هم د داعش په واک کې ورکول کېدې. د افغانستان امنیتي ځواکونه ويښ او بیدار دي او دا ډول دسیسې به خنثی کوي.»
مجاهد د پاکستان د پوځي رژیم بریدونو ته د ځواب ورکولو خبره داسې مهال کوي چې له دې مخکې هم افغان ځواکونو د تېر کال د بریدونو په ځواب کې لسګونه پاکستاني پوځیان وژلي ووژل او درې تنه یې ترې ژوندي ونیول.
د پاکستان دا درې نیول شوي پوځیان تېره اوونۍ د سعودي عربستان په منځګړیتوب او د روژې مبارکې میاشتې د پیل په درناوي خوشي شول.
ذبیح الله مجاهد د پاکستان پوځي رژیم په دې پړ کړ چې په خپله خاوره کې یې د داعش ډلې ته پټنځایونه او روزنیز مرکزونه جوړ کړي، ترڅو د سیمې او نړۍ امنیت له جدي ګواښ سره مخ کړي.
ذبیح الله مجاهد زیاتوي: « بېله شکه زموږ هدف به ملکیان نه وي؛ زموږ انتقام که اخیستل کېده، پر هغو مجرمانو به برید کوو چې په دې ډول جرمونو کې ښکېل دي.»
دا په داسې حال کې ده چې د تېر ۲۰۲۵ کال په اګسټ کې هم پاکستان پر خوست او ننګرهار ولایتونو بریدونه کړي وو. هغه مهال پاکستان په ډاګه دغه بریدونه نه وو منلي، خو افغان حکومت په کابل کې د پاکستان د سفارت سرپرست احضار کړ او دا یې د پاکستان کار وباله.
همدارنګه پاکستان په خوست او کونړ کې د ډیورڼد فرضي کرښې ته نږدې پرتو سیمو کې ورته بریدونه وکړل او ملکي وګړو ته یې مرګ ژوبله واړوله.
