بهرنیو چارو وزارت پر ننګرهار او پکتیکا ولایتونو د پاکستان پوځي رژیم د هوايي بریدونو په تړاو په کابل کې د پاکستان سفیر احضار او خبرداری یې ورکړی چې د دا ډول بریدونو د بدو عواقبو مسوولیت به د مقابل لوري پر غاړه وي.
د بهرنیو چارو وزارت مرسیتال ویاند ضیاء احمد تکل وايي، په کابل کې د پاکستان سفیر ته د وړمې شپې د بریدونو په تړاو د افغانستان احتجاج لیک وسپارل شو.
تکل زیاتوي، د بهرنیو چارو وزارت د پاکستان د پوځي رژیم له خوا تېره شپه د افغانستان د هوايي حریم نقض او پر ولسي خلکو بمباري په کلکو ټکو غندي او دا یو پاروونکی اقدام بولي.
د بهرنیو چارو وزارت مرستیال ویاند وايي: « د افغانستان اسلامي امارت د بهرنیو چارو وزارت د پاکستاني پوځ له خوا د افغانستان هوايي حریم نقض او پر ولسي وگړو بمباري په کلکو ټکو غندي او د افغانستان د ځمکنۍ بشپړتيا صريح نقض او پاروونکی عمل یې گڼي. همداراز پاکستاني لوري ته په ډاگه شوه چې د افغانستان د حریم ساتنه د افغانستان اسلامي امارت شرعي مسوولیت دی او د دغه ډول بریدونو د بدو عواقبو مسوولیت د مقابل لوري پر غاړه دی.»
همدارنګه، ملي دفاع وزارت بیا دې بریدونو ته په خپل غبرګون کې وايي، د ملي دفاع وزارت دا بریدونه په کلکو ټکو غندي او د ټولو نړیوالو او ګاونډیتوب اصولو خلاف عمل یې بولي.
دفاع وزارت په مناسب وخت کې د حساب شوي ځواب خبرداری ورکوي.
د ملي دفاع وزارت مرستیال ویاند صدیق الله نصرت وايي: « د تېرو تجاوزونو په دوام، یو ځل بیا پاکستاني پوځي رژیم د افغانستان ننگرهار او پکتیکا ولایتونو په څو ملکي سیمو، یوې دیني مدرسې او ګڼو ملکي کورونو، هوايي بریدونه ترسره کړل چې د ښځو او ماشومانو په ګډون لسګونه بېگناه ملکي وگړي په کې شهیدان او ټپیان شول. د ملي دفاع وزارت د افغانستان د ملي حریم دغه ښکاره نقض او جنایت په کلکو ټکو غندي او دا عمل د نړیوالو قوانینو، د ګاونډیتوب اصولو او اسلامي ارزښتونو ښکاره سرغړونه بولي. ملي دفاع وزارت د هېواد د حریم او د ولس د امنیت ساتنه خپل شرعي او ملي مسوولیت ګڼي او په مناسب وخت کې د مناسب او حساب شوي ځواب خبرداری ورکوي، ان شاءالله تعالی. پر ملکي اهدافو او دیني مراکزو بریدونه د پاکستاني پوځ د استخباراتي او امنیتي ناکامۍ څرګند ثبوت دی او دغه ډول تکراري تېري به هېڅکله د دوی داخلي ناکامۍ پټې نه کړي.»
د پاکستان پوځي رژیم د وړمې شپې د بمباریو په اړه د اسلامي امارت له خوا دا څه داسې مهال کېږي چې له دې مخکې هم د پاکستان پوځي رژیم څو ځلې د افغانستان هوايي حریم نقص کړی او ولسي وګړو ته یې مرګ ژوبله اړولې. د ملي دفاع وزارت ځواکونو بیا په ځوابي اقدام کې لسګونه پاکستاني پوځیان وژلي او ځینې یې ترې ژوندي هم نیولي وو.
همدا تېره اوونۍ د سعودي عربستان یوه پلاوي کابل ته سفر وکړ او اسلامي امارت د دوی په غوښتنه او د روژې مبارکې میاشتې د پیل په درناوي درې پاکستاني پوځیان چې د ډیورنډ فرضي کرښې په اوږدو کې د جګړې پرمهال اسیران شوي وو، خوشي کړل.
د یادونې وړده چې د عامو خلکو ترڅنګ یو شمیر سیاستوالو، د هېواد پخوانیو ولسمشرانو او د بشر د حقوقو نړیوالو ادارو هم پر افغان خاوره د پاکستاني پوځي رژیم بریدونو ته غبرګونونه ښودلي او هغه یې غندلي دي.
