Skip to content
د افغان ښځو او بشري حقونو لپاره د امریکا متحده ایالتو ځانګړې استازې رینا امیري، پخواني ولسمشر حامد کرزي او ګڼو نورو له شپږم ټولګي پورته د نجونو ښوونځيو نه پيل کېدو له امله غبرګونونه ښودلي دي.
دوی پرته له ځنډه د نجونو ښوونځیو بیا پیل غوښتنه کړې ده .
پخوانی ولسمشر حامد کرزو وايي، د افغانستان پر ځان بسیا کېدو او پرمختګ دروازې دې نه تړل کېږي.
هغه پر خپله فېسبوپاڼه لیکلي:« د اسلامي امارت له سرپرست حکومته غواړي،ترڅو د یو مترقي او سیال افغانستان لپاره،چې د ټولو افغانانو هیله ده،د نجونو د تعلیم لاره پرانیستلې وساتي او پرې نږدي چې د هغو پرديو طرحه تطبیق شي، چې له تعلیم بې برخې، محتاج او ترلاس لاندې افغانستان غواړي.»
د افغان ښځو او بشر حقونو لپاره د امریکا متحده ایالتو ځانګړې استازې رینا امیري بیا پر خپله ټویټرپاڼه لیکلي، د نجونو پر مخ د لېسې ښوونځیو تړل کېدل نه یوازې د ا.ا د ژمنو ضعف ښيي، بلکې د کورنیو هیلې چې د خپلو لوڼو لپاره یې لري، له منځه وړي دي.
بل پلو د جرمني سفیر مارکوس پوتزل د افغان نجونو له شپږم ټولګي پورته د ښوونځي تړل کېدو په اړه پر خپله ټویټر پاڼه لیکلي:« دا نه یوازې پر هغو نجونو،چې غواړي زده کړې وکړي او راتلونکی یې جوړ کړي، یو ګوزار دی؛ بلکې د ا.ا د مخکېنیو څرګندونو سره هم ټکر عمل دی.»
اسلامي امارت اعلان کړی و،چې نن به په تول هېواد کې له شپږم ټولګي پورته د نجونو ښونځي پيل شي .
نن سهار ګڼ شمېر نجونې له اوږده ځنډ وروسته ښوونځیو ته ورغلې،خو د ننوتلو اجازه یې نه درلوده.
په ټولنیزو رسنیو کې هغې ویډیو خلک خواشیني کړي،چې یوه زده کوونکې ښوونځي ته د نه پرېښودو له امله ژاړي.
