Skip to content
د افغانستان اسلامي امارت د بهرنیو چارو سرپرست وزیر امیر خان متقي د سه شنبې پر ورځ د « ۱۴۰۱ کال د وري پر ۲ مه» افغانستان کې د ملګرو ملتونو سیاسي استازولۍ یا یوناما له مشرې دیبورا لاینز سره لېدنه کړې.
لېدنه کې دواړو پر بشري مرستو او حقونو، انکشافي پروژو، بانکي سکټور او د اقتصادي ودې ترڅنګ یې پر مهمو موضوعاتو ورسره خبرې کړې دي.
دیبورا لاینز ویلي،د ملګرو ملتونو د امنیت شورا په تېره غونډه کې یې د افغانستان په تړاو مثبت راپور وړاندې کړی،چې دا د اسلامي امارت د پرمختګ او لاسته راوړنو ښکارندوي کوي.
متقي تمه ښودلې، چې د یوناما ماموریت یو کلن تمدید به د افغانستان لپاره ښې پایلې ولري او د بشري مرستو تر څنګ به په سیاسي برخه کې هم اغېزمن ګامونه واخلي.
متقي ویلي، د نوي حکومت په رسیمت پېژندلو او پر شخصیتونو او اقتصادي برخو کې د بندیزونو لري کولو سره به د افغانانو اساسي حقوق خوندي شي.
د بهرنیو چارو سرپرست وزیر ویلي، په ملګرو ملتونو کې د افغانستان د استازي نه شتون په کور دننه او بهر د افغانانو حقونه تر پښو لاندې کړي دي.
