د خوست تڼیو ولسوالۍ ځوانانو له خوا د نیالګیو کېنولو ولسي حشر پيل شو. د دې حشر تنظیموونکي وايي، د ولسي حشر پرمهال به د دې ولسوالۍ له مرکز تر سورکوټ پورې د اد مامد سیاحتي سیمې ته پر غځېدلې لاره، شاوخوا ۵ زره نیالګي کېنول شي.
د دوی په خبره، د حشر موخه دا ده چې په دې ولسوالۍ کې وچکالي کمه، چاپېریال خوندي او زرغونو سیمو ته پراختيا ورکړل شي.
د حشر ګډونوال محمدالله ګران وايي: « د سمسور افغانستان لپاره په خپله هر یو کس یو نیالګی کېنوي. دغه کار اجر هم لري د اقلیمي بدلونونو ناوړه اغېزې به هم کمې کړي.»
د حشر ګډونوال ذبیحالله تڼی وايي: « ونې، غرونه او ځنګلونه د چاپېریال په ساتنه کې ډېر مهم رول لري. که غواړو چې ښه هوا او ښکلی چاپېریال ولرو، خلک باید نوي نیالګي کېنوي او د ونو له وهلو ډډه وکړي.»
د حشر ګډونوال غوښتنه کوي چې د اقلیمي بدلون، وچکالۍ او د زرغونو سیمو د کمښت له امله دې خلک د چاپېریال ساتنې مسوولیت پر غاړه واخلي.
دوی زیاتوي، ځنګلونو وهلو او د طبیعي سرچینو ناسم استعمال د اقلیمي بدلون ناوړه اغېزې ډېرې کړې دي او په خبره يې، اړتيا ده چې د ځنګلونو د تخریب مخه ونیول شي او د نویو نیالګیو په کېنولو سره زرغونې سیمې بېرته ورغول شي.
د حشر ګډونوال رحیم ګل وايي: « لکه څرنګه چې دلته نوي نیالګي کېنوو، باید په غرونو او ځنګلونو کې د شته ونو ستانه وشي او له وهلو یې ډډه وکړو.»
د حشر ګډونوال عبدالهادي وحدت وايي: « موږ دا نیالګي د دې لپاره کېنوو چې هېواد مو سمسور شي. دا یو ملي حشر دی او په کې د ټول خوست ځوانان ونډه لري. له نورو هېوادوالو هم هیله لرم چې په خپلو ولایتونو کې دا ډول حشر جوړ او نیالګي کېنوي.»
که څه هم هر کال د پسرلي په راتګ سره زرګونه نوي نیالګي کېنول کېږي، خو د نه پاملرنې له امله یې اکثریت بېرته له منځه ځي. د تڼیو ځوانان وايي، د نیالګیو کېنولو ترڅنګ به یې ساتنې ته هم جدي پاملرنه کوي.
