د کندهار ښار په نهمه ناحیه کې د سره صلیب په مالي ملاتړ د اوبو رسولو د دوو پروژو کار پیل شو.
دا پروژې د ۲۷ میلیونه افغانیو په لګښت د ۸۵۰ کورونو لپاره د پاکو اوبو برابرولو په موخه پلې کېږي.
کندهار کې د سره صلیب استازی عزت الله خالقي وايي: « له دواړو پروژو څخه هدف دا دی چې د نهمې ناحیې خلکو ته د څښاک پاکې اوبه ورسوو. په لومړۍ پروژه کې به ۸۵۰ کورنیو ته پاکې اوبه ورسول شي؛ په دې پروژه کې ۱۲۵۰ کیلومټره پایپونه شامل دي. بله پروژه په ارغنداب کې د څاه ګانو پروژه ده چې اوبه یې د لمریزې برېښنا په وسیله ایستل کېږي او تر نهمې ناحیې رسول کېږي.»
د کندهار نهمې ناحیې اوسېدونکي چې له کلونو راهیسې د اوبو له سخت کمښت سره لاس په ګرېوان دي او د اقتصادي ستونزو له امله د اوبو پېرلو وس هم نه لري ، د دغو پروژو د پیل هرکلی کوي.
دوی هیله څرګندوي چې د دې پروژو په پلي کېدو سره به یې ستونزې تر یوه حده هوارې شي، خو غوښتنه کوي چې پاتې کورنیو ته دې هم اوبه ورکړل شي.
د کندهار اوسېدونکی ملا الله داد وايي: « دلته خلک ۱۶۵ متره برمه ووهي، خو بیا هم یو اینچ اوبه ورکوي. د دې ساحې خلک په لاس ګاډو کې له شاه جهان پمپ څخه اوبه راوړي. موږ د دې پروژې له پلي کېدو څخه ډېره مننه کوو.»
د کندهار اوسېدونکی عبدالقدوس وايي: « د دې ځای اوسېدونکي بېوزله او غریبکار دي او د ځان لپاره د برمې کیندلو وس نه لري. اکثریت خلک په لاس ګاډو کې له نورو ځایونو اوبه راوړي، خو ځینې کسان بیا په ټانکرو کې اوبه راوړي.»
د کندهار اوسېدونکی داد محمد وايي: « زموږ خلک د اوبو له پلوه سخت په تکلیف دي. که خدای کول له دې پروژې سره به هوسا شي.»
د کندهار د اوبو رسولو ریاست مسوولین بیا په ښار کې د څښاک اوبو د شبکې پراخولو خبره کوي او وايي، د ښار له۱۰۳ زره کورونو څخه یوازې ۱۶ زره کورونه د اوبو رسولو شبکې ته لاسرسی لري، خو هڅه کېږي چې دا شبکه پراخه شي.
د کندهار اوبو رسولو ریاست تخنیکي آمر انجینر مومن خان داودزی وايي: « په کندهار ښار کې شاوخوا ۱۰۳ زره کورونه دي چې له ډلې یې موږ شاوخوا ۱۶ سلنه د ټول ښار تر پوښښ لاندې لرو. همدارنګه ځینې شخصي کمپنۍ هم شته، لکه د عینو مېنې د اوبو شبکه چې د اپکو کمپنۍ له خوا یې خدمات وړاندې کېږي. په راتلونکي کې پلان لرو چې ټول ښار تر پوښښ لاندې ونیسو.»
د یادونې وړ ده چې په کندهار کې بېساري وچکالۍ ګڼ شمېر کورنۍ د اوبو په برابرولو کې له جدي ستونزو سره مخ کړې دي.
د کندهار د کرنې ریاست د مسوولینو په خبره، د وچکالۍ د کمېدو لپاره ۲۸۰ میليمتره ورښت ته اړتیا ده، خو تر اوسه په دې ولایت کې شاوخوا ۱۰۰ میليمتره ورښت ثبت شوی دی.
