څرخي پله زندان کې د پوهنې وزارت په همکارۍ او د یوه خیریه بنسټ په مالي ملاتړ ۱۲۰ تنو بندیانو ته په څلورو برخو کې درې میاشتنیو حرفوي زدهکړو کورس پيل شو.
چارواکي وايي، د اسلامې امارت په راتګ سره زندانونه د بندیانو لپاره په مدرسو او پوهنتونونو بدل شوي او په تېرو څلورو کلونو کې يې سلګونه کسانو ته عصري، دیني او مسلکي زدهکړې ورکړې دي.
د چارواکو په خبره، زندانونو کې بندیانو ته ټولې اسانتیاوې برابرې دي او هر مسوول له زندانیانو سره د ناسم چلن په صورت کې له دندې ګوښه کېږي.
د زندانونو چارو سمون ادارې ریيس محمد یوسف مستري وايي: « عدالت دا دی چې که زه له یوه بندي سره ظلم وکړم یا یې حق وخورم، زه هم باید دلته بندي شم.»
ځينې نور چارواکي بيا هيله لري چې له زندانونو خوشي شوي کسان به اوس مهال پر خپل زدهکړي مسلک بوخت وي او خپل شخصي کاروبار به لري.
د زندانونو چارو سمون ادارې د دفتر رییس رحمت الله ګلزار وايي: « موږ په دې کار کوو چې دلته په هر جرم راغلي بندیان چې کله له دې ځایه ازادېږي، دلته په زندان کې د زده کړي مسلک اړوند وسایل ورکړو، ترڅو په خپل کور کې په کار بوخت شي.»
بله خوا، د خیریه بنسټ مسوولان ډاډ ورکوی چې له زندانیانو سره هر ډول مرستو ته چمتو دي او له ازادۍ وروسته به ورته د کاروبار اسانتیاوې هم برابرې کړي.
د خیریه بنسټ مسوول ولید خان وايي: « زه تاسو ته ډاډ درکوم چې لکه څرنګه چې هڅه کېږي دلته د زندان په داخل کې تاسو ته د کار زده کولو زمینه برابرېږي، موږ هڅه کوو له دې ځایه له خوشي کېدو وروسته د کار موندلو په برخه کې هم له تاسو سره مرسته وکړو.»
چارواکي دغه راز زیاتوي، په اکثریت ولایتونو کې د زندانونو لپاره لويې ودانۍ جوړوي، داسې چې په ټولو عصري وسایلو به سمبال وي. دوی زندانیانو ته ډاډ ورکوي چې دوسيې يې پر وخت څېړل کېږي او له خوشي کېدو وروسته به د خپل مسلک اړوند برخو کې ورته په دولتي او نا دولتي ادارو کې کاري فرصتونه هم برابر کړي.
