د افغانستان برېښنا شرکت وايي، له لمر او ډبرو سکرو څخه د ۸۴۵ مېګاواټه برېښنا تولیدولو دا پروژې به د ۴۶۲ میلیونه امریکايي ډالرو په لګښت تر راتلونکو درېیو کلونو پورې بشپړې شي. دا پروژې به د پلازمېنې کابل په ګډون، په پروان، بغلان، تخار او غزني ولایتونو کې پلې شي.
د دغو پروژو د عملي کارونو پیلولو تړونونه د ریاست الوزراء اقتصادي مرستیال ملا عبدالغني برادر او د عزیزي ګروپ د عمومي رییس میرویس عزیزي په حضور کې د برېښنا شرکت او عزیزي ګروپ ترمنځ لاسلیک شول.
د افغانستان برېښنا شرکت چارواکي وایي، د يادو پروژو د تطبيق پر مهال به شاوخوا ۱۰۰۰ تنو ته په مستقیم ډول او زرګونو نورو کسانو ته په غير مستقيم ډول د کار زمينه برابره شي.
د افغانستان برېښنا شرکت عمومي رییس ملا عبدالحق همکار وايي: « د یادو پروژو ټولیز ظرفیت ۸۴۵ مېګاواټه دی او نږدې له ګاونډیو هېوادونو څخه د وارېدېدونکې برېښنا له ټول ظرفیت سره برابر دی. پر دغو پروژو د پانګونې ټولیزه اندازه شاوخوا ۴۶۳ میلیونه امریکايي ډالر چې نږدې ۳۰ میلیارده افغانۍ کېږي، اټکل شوې. ټاکل شوې د عزیزي انرژي ګروپ له خوا تمویل او پانګونه پرې وشي.»
د اوبو او انرژۍ او د کانونو او پټرولیم وزیرانو ډاډ ورکړ چې د عزیزي ګروپ په ګډون له ټولو کورنیو او بهرنیو سوداګرو او پانګوالو څخه پوره ملاتړ او همکاري کوي.
د دوی په خبره، هېواد د ټولو ګډ کور دی او د ابادولو او پرمختګ مسوولیت یې هم د ټولو پر اوږو دی.
دوی زیاتوي، حکومت هڅه کوي پانګونې لپاره خوندي او مناسب چاپېریال برابر کړي، ترڅو ملي شتمنۍ د هېواد د اقتصادي پیاوړتیا لپاره وکارول شي.
چارواکي دغه راز وایي، اوسمهال په هرات کې د ټاپي پروژې ودانیز کارونه په ښه ډول روان دي او د روان زیږدیز کال تر پایه پورې به بشپړ شي.
د اوبو او انرژۍ وزیر مولوي محمد یونس اخندزاده وايي: « زموږ نور پانګوال چې په هره برخه کې کار کوي، د اسلامي امارت مسوولین دېته ژمن دي چې د دوی هر ډول ملاتړ وکړي، ترڅو هېواد ځان بسیا شي.»
د کانونو او پټرولیم وزیر ملا هدایت الله بدري وايي: « غواړم چې د کانونو وزارت په استازیتوب عزیزي ګروپ او د هېواد نورو پانګوالو ته دا ډاډ ورکړم چې موږ چمتو یو، ترڅو د برېښنا د تولید لپاره په هره اندازه ډبرو سکاره په واک کې درکړو.»
بل پلو، د عزیزي ګروپ مشر میرویس عزیزي وایي، د افغانستان د اقتصادي او بنسټیز پرمختګ نوی پړاو د اسلامي امارت له بیا واکمنېدو او د هېواد د بشپړې خپلواکۍ له لاسته راوړلو وروسته پیل شوی دی. عزیزي ټینګار کوي خپلواکي د هر ډول تلپاتې پرمختګ اساسي شرط دی.
د عزیزي ګروپ مشر دغه راز وايي، د هېواد د ډېرو ستونزو د حل بنسټیزه لاره د برښنا د تولید له پلوه پر ځان بسیاکېدنه ده.
عزیزي زیاتوي، تر هغو چې افغانستان د خپلې اړتیا وړ برېښنا خپله تولید نه کړي، صنعتي وده او اقتصادي ثبات به یې محدود پاتې وي.
د ده په خبره، د ٢٠٢٦ کال تر پایه پورې به د ٧ زره مېګاواټه نورې برېښنا د تولید کارونه هم پيل شي.
د عزیزي ګروپ رییس میرویس عزیزي وايي: « موږ به دوه یا درې میاشتې وروسته دغه شان محفل بیا ولرو او له ۲ تر ۳ زره مېګاواټو بل تړون به لاسلیک کړو. موږ به د کال تر پایه پنځه یا شپږ زره مېګاواټو برېښنا تړونونو ته ځان ورسوو. موږ د کانونو له وزیر سره خبرې کړې او که چېرې د ټاپي پروژې اړوند ځینې مسایل حل شي، موږ په عاجله توګه هرات کې د ۳ زره مېګاواټو برېښنا د تولید کارونه هم پيل کړو.»
دا په داسې حال کې ده چې د روان لمریز کال د زمري میاشت کې د عزیزي ګروپ مشر میرویس عزیزي په کابل کې د ۱۰ میلیارده امریکايي ډالرو په ارزښت د انرژۍ د تولید پروژې هوکړه لاسلیک کړه.
افغانستان دا مهال خپله د اړتیا وړ نږدې ۸۰ سلنه برېښنا له ګاونډیو هېوادونو او په ځانګړې توګه له ازبېکستان، تاجيکستان، ترکمنستان او ایران څخه واردوي.
