د پاکستان له لوري په خپله خاوره او خيبرپښتونخوا کې له افغانانو سره د روان زور زیاتي په دوام، د کډوالو په چارو کې د ملګرو ملتونو عالي کمېشنرۍ (یو.اېن.اېچ.سي.آر) موندلې چې د پاکستان پر خاوره او خیبرپښتونخوا مېشت افغانان هلته له خپلو حقه او اساسي حقونو بې برخې کړای شوي دي.
د يادو موندنو له مخې، د ملګرو ملتونو يادې ادارې دا هم ويلي چې حقونو ته له لاسرسي نه لرلو سربېره، افغان کډوال له سختو امنيتي او ټولنيزو ستونزو سره هم مخ دي.
د پاکستان لپاره د کډوالو په چارو کې د ملګرو ملتونو عالي کمېشنرۍ استازې فیلیپاکېنډلر وايي: « په پاکستان کې افغان کډوال خپلو بنسټیزو حقوقو ته لاسرسی نه لري. دوی په دې هېواد کې له امنیتي او ټولنیزو ستونزو سره مخ دي. د دوی له حقونو ملاتړ او د انساني کرامت ساتل یې مهم دي. ملګري ملتونه له خپلو شریکانو سره په همکارۍ د دوی د حقونو خوندي کولو هڅه کوي.»
په پاکستان او خيبرپښتونخوا کې مېشت افغان کډوال وايي، د پاکستان حکومت ورسره ناسم چلن کوي او په دې ساړه ژمي کې يې د دوی جبري ایستلو لړۍ لا چټکه کړې ده.
دوی د کډوالو او بشري حقونو له مدافع نړیوالو بنسټونو غواړي چې ستونزې یې حل کړي او پاکستان ورسره له ناسم چلن را وګرځوي.
پاکستان مېشت افغان کډوال مجاهد شینواری وايي: « پاکستان افغان مهاجرینو ته په خپله خوښه ځای ورکړی او دا یې منلې وه چې په زور به یې نه وباسي. د افغان کډوالو په زور شړل له نړیوالو اصولو او بشري حقونو سرغړونه ده. موږ له ملګرو ملتونو او د بشري حقونو له سازمانونو غوښتنه کوو چې د پاکستان د زور زیاتي مخنیوی وکړي او د افغان کډوالو غم وخوري.»
بله خوا، ځينو پاکستاني رسنیو راپور ورکړی چې دا هېواد غواړي هغه ۱۹ زره ۹۷۳ افغانان بېرته افغانستان ته ستانه کړي چې امریکا ته د تګ په تمه پاکستان کې مېشت دي.
د دې راپورونو له مخې، د پاکستان کورنیو چارو وزارت د ياد شمېر افغان کډوالو د بېرته ستنولو په اړه ټولو ایالتي حکومتونو ته د لیکونو په استولو سره سپارښتنې هم کړې دي.
څارونکي بیا وايي، پاکستان تل د افغانانو پر وړاندې دوه مخی چلن کړی او د دوی له ناسمو سیاستونو افغان کډوال هم خوندي نه دي پاتې.
د سیاسي چارو شنونکی کمال ناصر اصولي وايي: « پاکستان تل له افغانانو سره دوه مخی چلن کړی. د دوی له ظالمانه سیاستونو افغان کډوال هم نه دي خوندي. دوی هلته مېشت کډوال وهلي، رټلي او بندیان کړي دي. پاکستان تل د کډوالۍ اصول نقض کړي، له بشري حقونو یې سرغړونه کړې او له افغان مهاجرینو سره ظالمانه چلن لري.»
له ۲۰۲۳ کال راهیسې پاکستان په دې هېواد او خيبرپښتونخوا کې د مېشتو افغان کډوالو د جبري اخراج لړۍ پیل کړه. د اخراج پرمهال يې پانګې ترې ګرځولې دي او ان د خپل کور وسایلو راوړلو ته یې هم نه دي پرېښي. له افغان کډوالو سره د پاکستان دا چلن د سیمې او نړۍ په کچه غندل شوی هم دی.
