د افغانستان لپاره د امریکا پخواني ځانګړي استازي ویلي، پاکستان د داعش ډلې هغو غړیو ته روزنیز کمپونه جوړ کړي او د افغانستان په ضد یې کاروي چې له دې وړاندې په افغانستان کې د اسلامي امارت د اقداماتو په پایله کې مات او پاکستان ته تښتېدلي وو.
زلمي خلیلزاد له یوه هندي ټلویزیوني چینل(NDTV) ته ویلي، د اسلام اباد تګلاره پېچلې ده او هغه مهال چې امریکايي ځواکونه په افغانستان کې وو، اسلام اباد هم دوی ته اکمالاتي لارې پرانستې وی او هم یې هغه خلک ساتل چې د امریکایاتو او ناټو پر ضد جنګېدل.
زلمي خلیلزاد زیاته کړې: « طالبان او داعش هغه مهال هم له یو بل سره جنګېدل چې زموږ ځواکونه په افغانستان کې وو؛ اوس چې طالبانو واک ترلاسه کړی، دوی د داعش ډلې په خلاف اقدامات لا زیات کړي او په پایله کې د دې ډلې زیات شمېر غړي پاکستان ته تښتیدلي. البته پاکستان د داعش ډلې دغو غړو ته کمپونه پرانستي او له هغو نه د افغانستان پر ضد کار اخلي.»
د خلیلزاد له خوا دا څرګندونې وروسته له هغې شوې چې د تېرې اوونۍ په وروستیو کې د ملګرو ملتونو امنیت شورا ځینو غړیو هېوادونو په افغانستان کې د داعش ډلې پر موجودیت او فعالیتونو اندېښنه څرګنده کړه.
د امریکا، چین او پاکستان استازو د امنیت شورا په غونډه کې وویل، دا ډله په افغانستان کې فعالیت لري او له هغه ځایه سیمه او نړۍ ګواښي.
خو اسلامي امارت بیا دا ادعا یوځل بیا په کلکه رد کړه او هغه یې په امنیت شورا کې د دوی له نه موجودیت څخه د ځینو هېوادونو چې د افغانستان د حالاتو په اړه تبلیغات کوي، ناوړه ګټه پورته کول وبلل.
د اسلامي امارت ویاند ذبیح اله مجاهد له شمشاد ټلویزیون سره په خبرو کې وايي، داعش ډله له افغانستان څخه بهر ده او نړیوالو ته په کار ده چې دا ډله په ګاونډیو هېوادونو کې ولټوي، خو ښاغلي مجاهد د کوم هېواد نوم وانخست.
د اسلامي امارت ویاند ذبیح الله مجاهد وايي: « متأسفانه د ملګرو ملتونو په غونډو کې افغانستان حضور نه لري. ځینې هېوادونه او ځینې کړۍ هلته منفي تبلیغات کوي او ناسم معلومات ورکوي او دا طبیعي خبره ده چې د غونډې پر فضا اغېز وکړي. واقعیت دا دی چې افغانستان امن دی، ثبات لري، غښتلي امنیتي ځواکونه لري او د افغانستان ټوله خاوره یې تر کنټرول لاندې ده. دلته خپلسرې ډلې وجود نه لري او د داعش پدیده هم د افغانستان له جغرافیې وتلې ده، خو له بده مرغه په ځینو ګاونډیو هېوادونو کې دوی ته پناه ورکول او کاروبار روان دی.»
په ورته وخت کې یو شمیر کتونکي بیا په پاکستان کې روانې ناامنۍ خپله د اسلام اباد زېږنده بولي او وايي، اسلام اباد هڅه کوي په دې ډول افغانستان په سیمه کې منزوي کړي.
که څه هم دوی تر یوه بریده د انتقاد ګوته لوېدیځې نړۍ ته نیسي او وايي، دوی ښه پوهیږي چې په سیمه کې فعالې ټولې ترورستي ډلې د پاکستان له ملاتړ برخمنې دي.
د چارو شنونکی توریالی ځاځی وايي: « موږ له پاکستانه د خطر احساس کوو. دا هېواد د داعش او القاعدې پټنځای دی. همدا اوس چې په پاکستان کې کومې نا امنۍ روانې دي، دا خپله د پاکستان د حکومت او پوځ په اشارو کېږي، ترڅو د ملامتۍ ګوته افغانستان ته ونیسي او پر نړۍ یې تحریم کړي. تر ټولو لویه جفا د نړۍ هېوادونه کوي؛ هغوی ښه ویني چې داعش په پاکستان دی او د القاعدې مشر هم هلته ووژل شو، خو دوی یې پر وړاندې عکس العمل نه ښيي.»
ځینې نور شنونکي بیا د داعش پر وړاندې د اسلامي امارت مبارزه ستايي او وايي، د اسلامي امارت له بیا واکمنېدو مخکې هم د داعش پر ضد د مبارزې ډول وهل شوی و او د دې مبارزې لپاره د نړیوالو ملاتړهم جلب کړای شوی و، خو دوی ونه کړای شول چې دا ډله وځپي.
د سیاسي چارو شنونکی اخترمحمد راسخ وايي: « اسلامي امارت د داعش پر وړاندې داسې مبارزه وکړه چې په سیمه کې د دې پدیدې له جوړېدو راهیسې چا نه وه کړې. جمهوریت د داعش په ځپلو کې مطلق بریالی نه و، خو اوس اسلامي امارت په دې برخه کې بریالی او د ستاینې وړ دی.»
د چارو ډېری کتونکي په دې باور دي چې پاکستان په نړیوالو دريځونو د افغانستان له غیابت ناوړه ګټه پورته کوي او هڅه کوي چې د افغانستان حالات هغه ډول ترسیم کړي چې اسلام اباد یې غواړي. دوی سپارښتنه کوي چې اسلامي امارت باید ملګري ملتونه قانع کړي چې لږ تر لږه د افغانستان په اړه په نړیواله کچه په بحثونو کې افغانستان استازي وروبولي، ترڅو د حالاتو په اړه ریښتینی انځور واخستلای شي.
