د پکتیا ولایت په مرکز ګردېز ښار کې حلبي سازان وايي، صنعت یې ورځ تر بلې د غوړېدو په حال کې دی او په دې بریالي شوي چې د ولایت په کچه د خلکو اړتیاوې پوره کړي.
د دوی په خبره، په کورنیو تولیداتو د خلکو باور مخ په زیاتېدو دی او له همدې امله اړتیا ده حکومت په صنعتي پارک کې مناسب ځای او نورې اسانتیاوې ورته برابرې کړي.
حلبي ساز ولي محمد وايي: « د حلبي جوړولو په کار کې لومړی کابل دی او دویم نمبر کې پکتیا راځي.»
حلبي ساز سید احمد شاه وايي: « ډېری داسې توکي شته چې موږ یې اوس دلته جوړوو، خو پخوا له پاکستان څخه راتلل.»
د ګردېز اوسېدونکی احمد جان وايي: « دلته دا وطني بخارۍ، صندوقونه، کندوان او نور ښه په لوړ کیفیت جوړېږي. له خلکو غوښتنه کوو چې دا توکي وپېري.»
اخوا بیا د ګردېز ښاروالۍ چارواکي وايي، دوی په ګردېز ښار کې د حلبي سازانو ترڅنګ د نورو کسبګرو لپاره د فعالیت ځانګړي مارکېټونه او ساحې ټاکلې دي، ترڅو د دوی صنعت وده وکړي.
د دوی په خبره، د صنعتي فعالیتونو په پراخېدو سره به د بې روزګارۍ کچه هم ټیټه شي.
د ګردېز ښاروالۍ د ښاري حکومتولۍ آمر محمد صابر ابن الصدیق وايي: « له تحولاتو وړاندې د ګردېز ښار په ساحه کې ګڼو صنفونو فعالیت درلود، خو د اسلامي امارت په راتګ سره ګڼ دا صنفونه له ښار بهر انتقال شول. د دوی په انتقال سره ښاري نظم هم برابر او د لوړې کرایې مخنیوی وشو.»
پکتیا کې د حلبي سازۍ صنعت له غوړېدو سره پر کورنیو تولیداتو د خلکو باور زیاتېدو ترڅنګ، سلګونو ځوانانو ته د کار فرصتونه هم برابر شوي دي.
د دې برخې صنعتکاران باور لري چې که ملاتړ یې وشي او لازمې اسانتیاوې ورته برابرې شي، د همدې صنعت په مرسته د کورنیو تولیداتو له لارې د خلکو اړتیاوې پوره کولی شي.
