د هرات ولایت د کرخ ولسوالۍ پاشدان بند چې د اوبو له مهمو زېرمو څخه شمېرل کېږي، د وروستیو ورښتونو له امله په کې د اوبو کچه لوړه شوې ده.
په دې بند کې د اوبو کچې لوړېدو نه یوازې د کرنې او اوبو مدیریت په برخه کې هیلې راټوکولې دي بلکې د بند ساحه یې د سیمې اوسېدونکو لپاره په زړه راښکوني تفریحي ځای بدل کړی.
ګڼې کورنۍ، ځوانان او د طبیعت مینهوال د ارام، تفرېح او ښکلي طبیعي چاپېریال څخه د خوند اخیستو لپاره پاشدان بند ته ورځي او له طبیعت یې خوند اخلي.
د هرات اوسېدونکی عبدالرازق وايي: « دا د ټول ملت ګټه شتمني ده، یوازې زه نه بلکې ټول خلک خوشاله دي. دلته باید نیالګي او زینتي بوټي کېنول شي او د خلکو تفرېح ته مناسب ځایونه جوړ شي.»
د هرات اوسېدونکی شریف احمد وايي: « دا بند زموږ د ټولنې ملي پانګه ده او موږ یې باید په ساتلو کې ونډه واخلو. دلته د هرات خلک او د نورو ولایتونو خلک د تفرېح لپاره راځي او خوند اخلي.»
دا بند د خلکو لپاره د مېله ځای ترڅنګ د ځمکې لاندې اوبو زېرمو ډکولو په تړاو هم د خلکو هیلې را ژوندۍ کړې دي.
د هرات اوسېدونکی عبدالمجید وايي: « په دې بند کې راټولې شوې اوبه د هرات ترځمکې لاندې اوبو تغذیه کولو کې هم مهم رو ل لري. همدارنګه دا ځای د خلکو لپاره یو غوره تفرېح ځای هم دی.»
بله خوا مسوولین وایي، د پاشدان بند د ساتنې او ښه مدیریت لپاره هڅې دوام لري. د دوی په خبره، هڅه کوي د بند شاوخوا د خلکو تګ راتګ او تفرېح لپاره لازمې اسانتیاوې رامنځته کړي، خو له خلکو هم غوښتنه کوي چې د بند شاوخوا پاکوالي ته پاملرنه وکړي او د خوندیتوب اصول په پام کې ونیسي.
د پاشدان بند د ساتنې انجینرۍ ټیم غړی سراج الدین خالد اغا وايي: « زه ټولو خلکو ته سپارښتنه کوم چې دلته د تفرېح لپاره راځي، بند ته له غورځېدو دې ځان وساتي.»
پاشدان بند چې د هرات ښار ۲۵ کیلومټرۍ کې موقعیت لري، د ۵۴ میلیون متر مکعب اوبو زېرمه کولو ترڅنګ، د دوه مېګاواټه برېښنا او ۱۳ زره هکټاره ځمکې خړوبولو ظرفیت لري.
