د جلال اباد ښار پنځمه ناحیه کې د یوه پارک جوړېدو چارې د تېر حکومت پرمهال د نړیوال بانک په مالي لګښت پیل شوې وې، خو د اسلامي امارت له راتګ وروسته یې کارونه درېدلي وو او اوس د جلال اباد ښاروالۍ په خپله بودیجه تکمیلېږي.
مسوولین وايي، له دې پارک سربېره په ښار کې د درېیو نورو پارکونو جوړېدو چارې هم پیل شوې دي.
د جلال اباد ښاروالۍ د تخنیکي او سکټوري چارو رییس انجینیر وحید الله مخلص وايي: « په دې پروژه کې موږ سره څلور پارکونه دي چې یو یې د عبدالحق مېنې پارک، بل انعکاس پارک او دوه نور هم په ۱۶ فامیلیو کې دي. په دې پارکونو کې ۹ زره متره پلې لارې او سنګ کارۍهم شته؛ همدارنګه د هر پارک لپاره بورویل، د آبیارۍ سیسټم، کانکرېټي څوکۍ، د ماشومانو لپاره د لوبو ځایونه، زینتي بوټي او کټارې شامل دي.»
د جلال اباد ښار اوسېدونکي خوښ دي چې د سیمې د ښکلا او خلکو د تفرېح په موخه پارکونه جوړېږي، خو ټینګار کوي چې ښار کې د ټولو هغو پارکونو کارونه باید بشپړ شي چې چارې یې نیمګړې پرېښودل شوې دي.
د جلال اباد اوسېدونکی محمد اصف وايي: « له پارک سره دا سیمه ښایسته کېږي، هوا او چاپېریال ورسره پاکېږي او د خلکو روغتیا ته ګټه رسوي. بله خبره دا ده چې د ښار په ځینو سیمو کې یو شمېر پارکونه نیمګړي پاتې دي؛ موږ له ښاروالۍ هیله لرو چې د دې پارکونو کارونه بشپړ کړي.»
د جلال اباد اوسېدونکی شېرمحمد وايي: « له دې وړاندې نړیوال بانک د ولسي تړون پروګرام په چوکاټ کې یو شمېر پروژې لرلې، خو د اسلامي امارت په راتګ سره یې کارونه پرېښودل او نیمګړې پاتې شوې. له ښاروالۍ څخه مننه کوو چې د دغو پروژو د بشپړولو کارونه یې بېرته پيل کړل.»
د جلال اباد ښاریان دغه راز وايي، ننګرهار کې د نړیوال بانک په مالي ملاتړ د لسګونه پلې کېدونکو پروژو چارې په ټپه ولاړ دي او غوښتنه یې داده چې حکومت او یا خپله نړیوال بانک باید دا پروژې بشپړې کړي.
د جلال ابا ښار اوسېدونکی تسلیم ذکي وايي: « د تېر نظام یا جمهوریت پرمهال نړیوال بانک ډېرې پروژې لرلې، خو د جمهوریت له سقوط سره پروژې هم په ټپه ودرېدې. له اسلامي امارت او نړیوال بانک غوښتنه کوو چې دا پروژې بېرته پیل کړي؛ ځکه دا پروژې عام المنفعه دي او ټولو ته یې ګټه رسېږي.»
د جلال اباد ښار اوسېدونکی خپلواک وايي: « له حکومتي چارواکو او ترڅنګ یې نړیوال بانک څخه دا غوښتنه لرم چې په خپلو نیمګړو پروژو کارونه بېرته پیل کړي، ترڅو بشپړې او خلک ترې ګټه واخلي.»
د نړیوال بانک د نیمګړو پروژو د بېرته پیل کېدو او بشپړېدو غوښتنه داسې مهال کېږي چې یاد بانک په تېرو دوو لسیزو کې د بنسټیزو، پوهنیزو، روغتیا او عامه خدمتونو د پراختیا لپاره هېواد کې د سلګونه میلیونه ډالرو په ارزښت د پروژو چارې پیل کړې وې، خو د جګړو، امنیتي ستونزو او حکومت د بدلون له امله ډېری دا ډول پروژې نیمګړې پاتې شوې.
