د روسیې بهرنیو چارو وزیر سرګي لاوروف د کډ امنیت تړون سازمان(CSTO) له منشي تالاتبېک مسادیکوف سره په ناسته کې ویلي، په منځنۍ اسیا کې امنیتي ګواښونه او د افغانستان پرمختګونه د دې سازمان لپاره لا هم د اساسي ستونزې په توګه مطرح دي.
لاوروف زیاته کړې، د دې سازمان غړي هېوادونه د منځنۍ اسیا امنیتي خطرونه او د افغانستان راتلونکی وضعیت ارزوي او په سیمه کې د احتمالي ناکراریو پراخېدو په اړه اندېښنه لري.
د روسیې بهرنیو چارو وزیر سرګي لاوروف ویلي: « د ډله ییز امنیت تړون سازمان پر وړاندې پرتې ستونزې نوې ننګونې او ګواښونه دي چې زه یې د منځنۍ اسیا پر وضعیت پورې تړلي بولم او دغه راز دا چې په افغانستان کې څه راپېښېږي؟»
روسیه، ارمنستان، بېلاروس،قزاقستان، قرغېزستان او تاجیکستان د ډله ییز امنیت تړون غړي هېوادونه دي او هر غړي ته يې متوجې خطر، مشترک ګواښ بلل کېږي.
له دې سره هممهاله، ځينو هندي رسنیو راپور ورکړی چې د روسیې بهرنیو چارو وزارت د سرګي لاوروف کلني مطبوعاتي کنفرانس ګڼې هغه پوښتنې او ځوابونه خپاره کړي چې په دې کنفرانس کې مطرح شوي وو.
په راپورونو کې راغلي، لاوروف د دې پوښتنې په ځواب کې چې ايا مسکو به د افغانستان او پاکستان یا پاکستان او هند ترمنځ د اختلافاتو د حل لپاره منځګړیتوب وکړي، ویلي، روسیه دې کار ته لېوالتیا نه لري، خو د یادو هېوادونو د غوښتنې په شرط به همکارۍ ته چمتووالی وښيي.
د روسیې بهرنیو چارو وزیر سرګې لاوروف ویلی: « مسکو د دې هېوادونو ترمنځ د منځګړیتوب رول نه لوبوي، خو موږ تل همکارۍ ته تیار یو، ترڅو د دوی ترمنځ اختلافات حل کړو؛ دا کار هغه مهال کېدی شي چې په دې اړه یوه غوښتنه وشي.»
اسلامي امارت د مسکو دې اندېښنو ته په ځواب کې تازه څه نه دي ویلي، خو له دې وړاندې یې د روسیې په ګډون د ګاونډیو او سیمه ییزو هېوادونو ټولې هغه اندېښنې رد کړې دي چې له افغانستان څخه د احتمالي امنیتي ګواښونو په اړه یې مطرح کړې وې.
شنونکي وايي، روسیه په سیمه کې د لوېدیځو هېوادونو پر وړاندې د سیاسي تقابل پر بنسټ دا ډول دریځ نیسي. د دوی په خبره، د مسکو او کابل ترمنځ د تعاملاتو کچه اوس دا اندېښنې تر ډېره حده هوارولی شي.
د سیاسي چارو شنونکی روحالله هوتک وایي: « د افغانستان په اړه د روسیې د امنیتي اندېښنو په مورد باندې د ځینو هېوادونو یو ډول څرګندونې، زه فکر کوم چې د بعضې موخو ترسره کولو لپاره استفاده کېږي. هغه څه چې په سیمه کې دننه ترسره کېږي، یو ډول بې ثباتي رامنځته کولو لپاره د ځینو هېوادونو له خوا په لاره باندې اچول کېږي. د افغانستان اسلامي امارت د رسمیت پېژندلو د رسمي ناستو او د شانګهای همکاریو سازمان په ناستو کې د فعال ګډون له لارې غواړي روسیه په افغانستان کې دا اندېښني د همکاریو له لارې مدیریت کړي.»
د روسیې بهرنیو چارو وزیر سرګي لاوروف له افغانستان څخه د احتمالي امنیتي اندېښنو په اړه تازه څرګندونې داسې مهال کړې چې له دې وړاندې د دې هېواد ولسمشر ولادیمیر پوتین او د ملي امنیت شورا منشي سرګي شویګو هم ورته اندېښنې مطرح کړي وې، خو اسلامي امارت بیا تل د روسیې په ګډون ټولو هېوادونو ته ډاډ ورکړی چې د افغانستان له خاورې به هېچا ته خطر پېښ نه شي.
