قطر، ایران، عمان او متحده عربي اماراتو ته د افغان کارګرانو استولو په اړه له هوکړې وروسته، اوس روسيې ته هم د افغان کارګرانو د لېږلو هڅې پيل شوې دي.
د کار او ټولنېزو چارو وزارت وايي، له روسي چارواکو سره په دې اړه خبرې دوام لري او تمه شته چې په دې اړه هوکړې ته له رسېدو وروسته ځوان، مسلکي او متخصص کاري ځواک ياد هېواد ته ولېږل شي.
د کار او ټولنيزو چارو وزارت ویاند سمیعالله ابراهیمي وايي: « د قطر ترڅنګ، روسیې، عربي متحده اماراتو، سعودي عربستان، ایران او عمان هېوادونو د کار له مسوولینو سره په اړیکه کې یو. د دغو هېوادونو له ډلې، د ایران اسلامي جمهوریت سره ډېر پرمختګ شوی او د هغه هوکړه لیک موسوده ورسره شریکه شوې چې د کارګرانو د استولو په اړه جوړه شوې. همدارنګه په دې اړه نظرونه تبادله شوې او هیله لرو په نږدې وخت کې یوه تفاهم ته په رسېدو بریالي شوو.»
د نوموړي په خبره، بهر ته د کاري ځواک پر لېږلو سربېره، حکومت هڅه کوي چې په کور دننه هم په دولتي او خصوصي سکټور کې خلکو ته کاري فرصتونه ایجاد کړي.
په ورته مهال، خلک روسيې ته د کاري ځواک لېږلو په اړه د حکومت د هڅو هر کلی کوي او وايي، په دې کار سره به ډېر ځوانان په کار بوخت او د بې روزګارۍ کچه ټيټه شي.
د کابل اوسېدونکی رضا محمد وايي: « دلته هېڅ کار نه شته او د تورخم دروازې له تړل کېدو سره نور هم کم شوي. منډوي ته لاړو شو، خو کار نه پیدا کېږي، بېرته تش لاس راشو.»
د کابل اوسېدونکی سمیعالله وايي: « زموږ اکثریت ځوانان بې کاره دي، له بلې خوا پاکستان او ایران څخه مهاجر را روان دي او له دې سره د کار بازار نور هم په ټپه ودرېد. له دولت هیله لرو د کار موندلو په برخه کې هڅې لا زیاتې کړي. که دولت په روسیه او نورو هېوادونو کې ځوانانو ته کار وګوري، دا به ډېر ښه شي او د خلکو اقتصاد به ورسره برابر شي.»
شنونکي بهر ته د افغان کارګرانو لېږل نه يوازې د خلکو بلکې د حکومت په ګټه هم بولي او باور لري چې په دې توګه به حکومت وکولی شي له نورو هېوادونو سره خپل مناسبات پراخ او غښتلي کړي.
د اقتصادي چارو شنونکی محمدیونس ځدراڼ وايي: « بهرنیو هېوادونو ته د افغانستان د مسلکي ځوانانو استول د بېکارۍ کچې په کمولو کې مرسته کوي، خو زما په اند هغه مسلکي ځوانان چې دا مهال وزګار دي او د کار لټه کوي، باید تر نورو مخکې واستول شي.»
له دې وړاندې په روسيې کې د افغانستان سفير هم مسکو ټايمز ورځپاڼې ته ويلي و چې هېواد يې روسيې ته د ماهر بشري ځواک لېږلو لپاره چمتو دی، ترڅو هلته د کار بازار اړتياوې پوره کړي.
