Skip to content
د افغانستان اسلامي امارت د لوړو زده کړو سرپرست وزیر عبد الباقي حقاني د چهار شنبې پر ورځ د « ۱۴۰۰ کال د کب پر ۱۸ مه» د افغانستان لپاره د اسلامي همکاریو سازمان له ځانګړي استازي طارق علي بخیت سره کتلي دي.
په دې کتنه کې دواړو اړخونو په هېواد کې د لوړو زده کړو په برخه کې د ګډو همکاریو په اړه خبرې وکړې.
حقاني د اسلامي همکاریو له سازمان وغوښتل،چې د افغانستان نړیوال پوهنتون د دیني او عصري زده کړو، په ننګرهار کې د اسلامي پوهنتون د جوړونې د پروژې چټکوالي، د مرکز او ولایتونو د پوهنتونونو ښځينه استادانو او محصلینو د لېږد لپاره د ترانسپورت ترتیب او تدارک، په ولایتونو کې د ښځو لپاره د ځانګړو پوهنتونونو د ایجاد، په اسلامي هېوادونو کې د افغان محصلانو لپاره د بورسونو او همدارنګه د هېواد په تحصیلي بنسټونو کې د کتابتونونو د تجهیز مرسته وکړي.
په ورته وخت کې د افغانستان لپاره داسلامي همکاریو سازمان استازي طارق علي بخیت د لوړو زده کړو وزارت د مشرتابه فعالیتونه وستایل او ویې ویل، یاد وړاندیزونه به د اسلامي همکاریو سازمان له چارواکو سره شریک او د مرستو راجلب کولو په برخه کې به هڅې وکړي.
