د رياستالوزرا اقتصادي مرستيال ملا عبدالغني برادر په هرات کې د ترکمنستان لومړي وزير له مرستيال او بهرنيو چارو له وزير رشيد مردوف سره په کتنه کې ویلي، ټاپي پروژې د هېوادونو ترمنځ د اړيکو پراختيا ته زمينه برابره کړې. ملابرادر زياته کړې، د ټاپي پروژې له امله د اړيکو پراختيا په لړ کې د سعودي عربستان يوه شرکت هم په ياده پروژه کې دپانګونې ته لېوالتيا ښودلې.
د ریاست الوزرا اقتصادي مرستیال دغه راز د تورغونډۍ – هرات رېل پټلۍ په پروژه کې د پانګونې لپاره د قزاقستان لېوالتيا ته په پام له ترکمنستان غوښتي چې د يادې پروژې پيلولو په اړه خپل دريځ روښانه کړي.
د ترکمنستان لومړي وزير مرستيال او بهرنيو چارو وزير رشید مردوف په دې لیدنه کې ويلي، هېواد يې د تورغونډۍ – هرات رېل پټلۍ پروژې پيلولو ته ژمن دی او دغه راز يې ډاډ ورکړی چې هرات ښار ته به د روان ميلادي کال تر پايه د ټاپي نلليکې غځولو چارې هم بشپړې شي.
د اسلامي امارت مرستيال وياند حمدالله فطرت د دې لیدنې په اړه وايي: « د ریاستالوزراء اقتصادي مرستیال همداراز د افغانستان له لوري د ټاپ پروژې د لار نقشې د نهايي کېدو لپاره بشپړ چمتووالی وښود او د دې ترڅنګ یې بالا مرغاب، خماب او قرقین ولسوالیو ته د برېښنا انتقال او د سیمه ییز اتصال د نورو پروژو د پيل لپاره د افغانستان له لوري د پوره همکارۍ ډاډ ورکړ. هغه د دواړو هېوادونو ترمنځ په روانو پروژو کې افغانانو ته د کاري زمینې د برابرېدو په اړه هم ټینګار وکړ.»
له دې سره، د دواړو لوريو ترمنځ د ټاپ برېښنا لېږد پروژو په اړه خبرې شوې او يو بل ته په يادو پروژو کې د بشپړو متقابلو همکاريو ډاډ ورکړل شوی.
