Skip to content
د زابل ولایت د پېښو ورړاندې د چمتوالي ادارې مشر مولوي راز محمد خالد وايي،د بې وزله او جګړه ځپلو کورنیو سره د مرستې لړۍ د شفافیت په موخه د ځانګړي ټاکل شوي پلاوي له لورې په پوره جدیت سره څارل کېږي.
خالد زیاته کړه:« د سروې او وېش پر مهال پوره شفافیت موجود دی، د همدې شفافیت لپاره مو د اړوند سيمو د ملا امانو،د ولایت استازو او نورو اړوند ارګانونو یو ګډ پلاوی د مرستې دغه بهیر څاري. موږ پوره هڅه کوو،چې مرستې مستحقو کورنیو ته ورسېږي.»
اخوا د کډوالو او بېرته راستنېدونکو ادارې مشر حمد الله صمیم بیا وايي، په دغه ولایت کې د تېرو جګړو تر څنګ د سختې او اوږدې وچکالۍ له امله د ۳زره بې ځيایه شویو کورنیو تر څنګ زرګونه نورې غربت ځپلې کورنۍ هم شته دی، چې اوږدمهاله مرستو ته اړتیا لري.
صمیم زیاته کړه:« زموږ د رسمي شمېرو له مخې، د تېرو جګړو او وچکالۍ له امله ۳زره کورنۍ بېځایه شوي دي. د دغو کورنیو تر څنګ مو زرګونو نورو کورنیو ته هم مرستې رسولي دي.»
په همدې حال کې هغه کورنۍ چې د خوراکي او غیر خوراکي توکو مرستې يې تر لاسه کړي، د مننې تر څنګ د مرستو د زیاتېدو او دوام غوښتنه کوي.
د زابل ولایت یو تن اوسېدونکی وايي:« موږ د یادو مرستو له امله مننه کوو. موږ ډېر خوښ یو،خو دغه مرستې لنډ مهاله دي. موږ غوښتنه کوو،چې یادې مرستې دې زیاتې شي.»
تر دې وړاندې د دغه ولایت چارواکو خبر ور کړی وو،چې له تېرو شپږو میاشتو راهیسې يې تر اووه زرو زیاتو کورنیو ته مرستې رسولي او د مرستو رسولو دغه لړۍ لا هم دوام لري.
د مسوولینو په خبره، یادې مرستې چې د نړيوالو مرستندویه ډلو له لورې تر سره کېږي، په کې د خوراکي او غیر خوراکي توکو تر څنګ د نغدي پیسو مرستې هم شاملې دي.
زابل، د هېواد په سوېل کې هغه ولایت دی،چې اوسېدونکي یې د تېرو جګړو تر څنګ وروستۍ وچکالۍ هم سخت ځپلي دي.
