د ۱۴۰۵ کال د حج په مراسمو کې سعودي عربستان له لوري افغانستان ته د ۳۰ زره کسانو سهمیه ورکړل شوې. د ارشاد، حج او اوقافو وزارت چارواکو په خبره، د حج فریضې اداء کولو دغه ونډه يې پر خلکو او حکومتي ادارو په عادلانه توګه وېشلې ده.
چارواکي زياتوي، د حج فریضې اداء کولو لپاره تلونکي دغه کسان به د اریانا افغان او کامایر هوايي شرکتونو له لوري له څلورو زونونو کابل، کندهار، هرات او بلخ څخه سعودي عربستان ته ولېږدول شي.
د ارشاد، حج او اوقافو وزير نورمحمد قاثب وايي: « د حج سهمیې لویه برخه مو په ټول هېواد کې د حج لپاره پر پخوانیو ثبت نام شویو متقاضیانو په شفافه او عادلانه توګه وېشلې ده.»
چارواکي دغه راز وايي، د تېر په پرتله به دا ځل افغان حاجیان سعودي عربستان ته په کم لګښت ولاړ شي. د دوی په خبره، تېر کال د هر حاجي لګښت ۲۸۲ زره او ۹۰ افغاني و، خو دا ځل به يې لګښت ۲۶۶ زره ۴۰۰ افغانۍ وي چې د تېر په پرتله ۱۵ زره ۶۹۰ افغانۍ کمښت په کې راغلی.
د ارشاد، حج او اوقافو وزیر وايي، د دې ټولو ترڅنګ به هر حاجي ته څه باندې ۱۶ افغانۍ اضافي لګښت هم معاف شي چې د ټولو حجاجو په کچه نږدې ۵۰۰ زره افغانۍ کېږي.
د ارشاد، حج او اوقافو وزير په دې اړه وايي: « سږ کال د یوتن حاجي لګښت ۲۶۶ زره ۴۰۰ افغانۍ دی. د سږني حج مصارف د تېر کال په پرتله ۱۵ زره ۶۹۰ افغانۍ کم شوي دي. د ټولې پروسې لګښت ۷ میلیارده ۸۱۸ میلیونه، ۳۰۷ زره ۲۰۰ افغانۍ کېږي.»
نوموړي له ټولو هغو افغانانو چې په ۱۴۰۵ کال کې حج ته ځي وغوښتل چې خپل لګښتونه دې تحویل کړي او زیاتوي چې، د هغو حکومتي ادارو سهمیه لرونکي چې تر اوسه یې خپل لګښتونه نه دي ورکړي، باید په یوه ځل خپل ټولګښت د حج ریاست له لارې اړوند بانک ته وسپاري.
د ارشاد، حج او اوقافو وزارت له ټولو افغان حاجیانو وغوښتل چې د حج په مراسمو کې له بې ځایه مصارفو او لګښتونو ډډه وکړي.
د ارشاد، حج او اوقافو وزارت د حج عمرې او زیارتونو رییس محمد نبي محمدي وايي: « په دې برخه کې د امیرالمؤمنین یو فرمان او حکوم راغلی، ترڅو د حج په چارو کې له اضافي لګښتونو مخنیوی وشي او خلک د ځینو کارونو په سرته رسولو اړ نه شي.»
د ارشاد، حج او اوقافو وزير له هغو کسانو چې یو ځل یا دوه ځلې یې حجونه کړي او بیا ځلې د نفلي حجونو لپاره سعودي عربستان ته ځي، غواړي چې نور دې د حج لپاره ورته مراجعه نه کوي او په دې توګه دې نورو افغانانو ته د حج اداء کولو فرصت ورکړي.
د ارشاد، حج او اوقافو وزير نورمحمد قاثب په دې اړه وايي: « دا چې زموږ په لوی شمېر هېوادوالو حج فرض دی او له کلونو راهیسې یې اداء کولو ته منتظر دي، نو هغه کسان چې فرضي حج یې مخکې اداء کړی وي، د نورو کسانو د حج رعایتونو په خاطر، هغوی ته د نفلي حج اداء کولو لپاره ځای نه شته او مراجعه دې نه کوي.»
دغه وزارت وايي، افغان زیارت کوونکو لپاره په مکرمه او مدینه منوره کې حرمینو ته نږدې د استوګنې ودانۍ نیول شوې او د مناسکو د زدهکړې په برخه کې د لارښود استادانو د استخدام پروسه پیل شوې ده. د چارواکو په خبره، د دې پروسې په بشپړېدو سره به لارښود استادانو ته په کابل کې سیمینارونه جوړ شي.
