د امربالمعروف، نهې عن المنکر او شکایتونو اورېدلو وزارت وايي، په تېرو نږدې پنځو کلونو کې د پلازمېنې کابل په ګډون، ټول هېواد کې د زرګونه نجونو د جبري ودونو مخه نېول شوې.
د یاد وزارت چارواکې وايي، د اسلامې امارت له بیا واکمنېدو راهیسې د امربالمعروف و نهې عن المنکر وزارت په هېواد کې د شاوخوا ۱۰ زره هغو نکاح ګانو مخه نېولې چې د نجونو او ښځو له رضایت پرته تړل کېدې.
دوی وايي، سربېره پر دې په روان ۱۴۰۴ لمریز کال کې سلګونه نورې ورته قضيي هم له دوی سره ثبت شوې او د خلاصون لپاره تر کار لاندې دي.
د امربالمعروف او نهې عن المنکر وزارت ویاند سیف اسلام خیبر وايي: « د امربالمعروف، نهې عن المنکر او شکایتونو اورېدلو وزارت ته په تېرو ۴ کالو کې د ټول هېواد په کچه د۱۰زره جبري نکاح ګانو مخنیوی کړی. دا زموږ د وزارت یوه لویه لاسته راوړنه ده. یوازې په روان ۱۴۰۴ هجري لمریز کال کې دغه شمېرې سلګونو ته رسېږي چې تر اوسه تایید او نهايي شوې نه دي.»
خیبر دغه راز وايي، په دې کې داسي نجونې هم وې چې د کورنیو له خوا په ډېر کم عمر کې په نکاح ورکړل شوې وي.
د دې ترڅنګ، د دې وزارت د معلوماتو له مخې، د زرګونو ښځو حقوقي ستونزې یې هم حل کړې دي.
په ورته مهال، ښځې په دې برخه کې د یاد وزارت کړنې ستايي او وایي، ډېرې کورنۍ اوس هم شته چې خپلې لوڼې او خویندې د پیسو په بدل کې د نجلۍ له رضایت پرته واده کوي.
دوی له اسلامې امارت غوښتنه کوې چې هغو کسانو ته دې سزا ورکړي چې خپلي خویندې او لوڼې د پیسو په بدل کې پلوري.
د ښځو حقونو فعاله مدینه محمدي وايي: « موږ د امربالمعروف له دې کار څخه ډېرې خوښې او راضي یو. که په همدې ډول د افغان مېرمنو حقونو ته پاملرنه وشي او د افغانستان ښځې خپلو حقونو ته لاسرسی ولري، دا به د یوه پرمختللي او سوکاله افغانستان بنسټ وګرځي.»
د امربالمعروف او نهې عن المنکر وزارت مسوولینو په خبره، اسلامې امارت د شریعت په رڼا کې د ښځو حقونو ورکولو او خوندي کولو ته ژمن دی.
یاد وزارت له خلکو غواړي چې د هغو کورنیو په اړه معلومات ورکړي چې خپلې لوڼې یا خویندې په بدو کې ورکوي او یا یې هم د پیسو لپاره د نجونو له رضایت پرته په نکاح ورکوي، ترڅو د دې کارونو مخه ونیول شي.
