له تېرو څو ورځو راهیسې پر ټولنيزو رسنيو خپره شوې ویډیو ليدل کېږي چې په کې د ترکيې او ایران ترمنځ ګډه پوله کې يو افغان مهاجر ماشوم له دوو نورو افغانانو سره په واورو کې بند پاتې دي.
د ټولنيزو رسنيو فعالان د دې ماشوم د وضعیت په اړه خواشيني څرګندوي او د هغو ځوانانو مېړانه ستايي چې ماشوم له حتمي مرګ څخه ژغوري.
دا افغان ماشوم په اروپايي هېوادونو کې د مېشت کېدو په نېت پر قاچاقي لارو د تګ زړه ښه کړی، خو په داسې حال کې موندل شوی چې د سختې يخنۍ له امله يې د درېدو توان نه درلود.
اوس دا ماشوم د افغانانو له لوري ایران ته راوړل شوی او هلته له نورو افغان کډوالو سره يو ځای شوی.
ایران مېشت افغان کډوال عاشق الله وايي: « که موږ پنځه دقیقې نور هم دې ماشوم ته نه وای رسېدلي، ښايي ژوند یې له لاسه ورکړی وای. دغه شان ډېر نور ځوانان هم شته چې په لارو کې بند پاتې دي.»
ایران ته تللي ځوانان بیا وایي، تهران ته هم تلل تر پخوا ډېر ستونزمن شوي، خو په وطن کې د اقتصادي ستونزو له امله ځوانان دغو کړاوونو ته غاړه ږدي.
عاشق الله په دې اړه وايي: « اوس د دې ځوان وضعیت ښه دی او زه به یې افغانستان ته واستوم.»
افغانستان کې شته شرایطو ته په کتو، ډېر خلک خپل اولادونه بهرنیو هېوادونو ته په مزدورۍ پسې لېږي، حال دا چې له ستونزمنو لارو او د قاچاقبرو له ناوړه موخو خبر نه دي.
ځینې کارپوهان پر کورنیو غږ کوي چې خپلو اولادونو ته د سفر لپاره داسې لارې وټاکي چې قانوني او ژوند ته يې په کې خطر نه وي.
د اقتصادي چارو کارپوه عبدالنصیر ریښتیا وايي: « د افغانستان په داخل کې یوازینۍ ستونزه دا ده چې بېکاري او بېوزلي د دې سبب کېږي چې زموږ ځوانان بهر ته مسافر یا مهاجر شي.»
له دې وړاندې هم پر قاچاقي لارو د لسګونه افغان ځوانانو د مړینې راپورونه ورکول شوي دي. پوښتننه داده چې ولې افغان ځوانان په نورو هېوادونو کې د مېشت کېدو په تمه خپل هېواد پرېږدي؟
د چارو کارپوه ادریس محمدي ځاځی وايي: « باید له هېواد څخه د ځوانانو د تګ په اړه پر داسې ټکو غور وشي چې له امله یې ځوانان له وطن څخه تښتېدلو ته اړ کېږي.»
په هېواد کې بې کارۍ ته په کتو ،ګڼ شمېر افغانان د کار پېدا کولو په موخه ګاونډ ایران او نورو هېوادونو ته د تلو هڅه کوي. افغانستان کې اقتصادي ستونزې او په ایران او نورو اروپايي هېوادونو کې د کار بازار ته اسان لاسرسی هغه ستر لاملونه دي چې افغان ځوانان د غیر قانوني سفرونو انتخاب ته مجبوروي.
