عامې روغتیا وزارت په میندو او ماشومانو کې د حاد خوارځواکۍ مخنيوي او درملنې په موخه د عملي لارښوود تر عنوان لاندې پلان جوړ کړی، چې له مخې به يې د درملنې ترڅنګ په لرې پرتو سېمو کې خلکو ته د خوارځواکۍ په اړه عامه پوهاوی هم ورکړل شي.
چارواکي له دې امله پر وخت د خوارځواکۍ پر تشخيص او درملنې ټينګار کوي، چې ددوی په خبره په دې ا ړه د بې پروايۍ په صورت پرې د اخته کسانو د مړينې سبب هم کېدای شي.
د عامې روغتیا وزارت د روغتیايي خدمتونو وړاندې کولو معين عبدالولي حقاني وايي: « وزارت ژمن دی چې دغه لارښود یوازې د مرکز تر کچې محدود پاتې نشي بلکې په عملي بڼه د هېواد تر ټولو لرې پرتو سیمو پورې ورسېږي، زموږ موخه دا ده چې هر روغتیايي مرکز، هر روغتیايي کارکوونکي او هره ټولنه د خوارځواکۍ مخنیوي او مدیریت برخه کې روښانه لار ولري.»
چارواکي دامهال په خوارځواکۍ د اخته ماشومانو شمېر ۳.۷ ميليون تنه يادوي، چې له ډلې يې يو ميليون پر سختې او پاتې ۲.۷ ميليونه يې د منځنۍ کچې خوار ځواکي لري.
د دوی په خبره، په ماشومانو سربېره ۱.۲ ميليونه ميرمنې په ځانګړې ډول میندې هم له خوارځواکۍ کړېږي او زياتوي، چې په يادې ناروغۍ د اخته کسانو درملنې جدي هڅې روانې دي.
د عامې روغتیا وزارت د تغذيي رییس حکمتالله معصومي وايي: « د خوارځواکۍ ارقام تقریبا درې اعشاریه اووه میلیونه ماشومان په ۲۴ ولایتونه کې پر خوارځواکي اخته دي چې د هغوی له ډلې یو میلیون په شدیدې خوارځواکۍ اخته دي، دوه اعشاریه اوه میلیونه په متوسطې سوتغذیې اخته دي او د اویا زره په شاوخوا کې دا په های ریسک اخته دي چې له متوسطې سوتغذیي څخه شدید ته روان دي.»
ملګري ملتونه بيا ډاډ ورکوي، چې پر خوارځواکۍ اخته افغان ماشومان او ميندې يوازې نه پرېږدي او په درملنه کې به يې پوره همکاري کوي.
په افغانستان کې يونېسف استازی تاجالدين اویوالي وايي: «موږ ټول په ګډه هڅه کوو،چې په افغانستان کې د وګړو په ځانګړي ډول د خوارځواکو ماشومانو لاسنیوی وکړو. موږ په دې برخه کې په ګډه او په پوره همکارۍ سره مخته روان یوو او دا څه د ځان لپاره ویاړ ګڼو، چې په افغانستان کې دننه د ماشومانو ژوند او راتلونکي په اړه کار کوو. موږ په دې برخه کې د افغانستان له عامې روغتیا وزارت هم مننه کوو، چې زموږ ژمنو او همکاریو ته یې زمینه برابره کړې ده.»
عامې روغتيا وزارت که څه هم په خوارځواکۍ د اخته کسانو په درملنه کې له خپلو ټولو امکاناتو د کټې اخيستنې ډاډ ورکوي، ترڅنګ يې له نړيوال مرستندويانو هم غواړي، چې په دې برخه کې دې له افغانستان سره بشپړه همکاري وکړي.
