Skip to content
د افغانستان اسلامي امارت د کورنیو چارو سرپرست وزیر سراج الدین حقاني د لومړي ځل لپاره د شنبې پر ورځ د« ۱۴۰۰ کال کب پر ۱۴ مه» کابل کې د ملي پولیسو له اکاډمۍ ۱۳ دورې فراغت په اړه جوړو شویو مراسمو کې د رسنیو پر مخ ښکاره شو.
د کابل د پولیسو له اکاډمۍ په ۱۳ مه دوره کې ۳۷۰ تنه سرتیري او افسران چې ښځينه هم په کې شاملې دي، له پنځه کلنو زده کړو وروسته فارغ شول.
د پولیسو په فراغت غونډه کې، د کورنیو چارو له سرپرست وزیر سراج الدین حقاني سربېره د اسلامي امارت ګڼو نورو لوړپوړو چارواکو په کې ګډون کړی وو.
حقاني په خپله وینا کې ولس ته د ۴۰ کلنې جګړې د پای ته رسېدو مبارکي ورکړه او مسلکي کادرونو ته یې ډاډ ورکړ،چې کاري فرصتونه به ورته برابر کړي.
حقاني ډاډ ورکړ، چې هېچ چاته به اجازه ورنه کړي،چې د افغانستان خاوره د نورو پرضد وکاروي.
حقاني زیاتوي:« زموږ مسلکي کادرونه نن په ډېر تشویش کې دي. دوی ځانونه بې ګانه ښيي. خو موږ ورته ډاډ ورکوو،چې تاسې د دغه هېواد بچیان یاست. هېواد ته چوپړ کول مو شریکه دنده ده. په هېواد کې د امنیت تامین په اړه،لکه څرنګه چې موږ ولس او نړۍ ته ژمنه ورکړې، د بل چا لپاره به ګواښ نه وي.»
د پولیسو ملي اکاډمۍ مسوولینو بیا ډاډ ورکړ،چې د پولیسو مسلکي کېدو لپاره په ډېرو کمو امکاناتو هڅې کوي او ژمنه یې وکړه،چې ټولنې ته به ښه روزل شوي او مسلکي پولیس وړاندې کړي.
د ملي پولیسو اکاډمۍ قوماندان شیخ محمد نظر شینواری وايي:« د افغانستان ملي پولیسو اکاډمۍ قوماندان په توګه ویاړم، چې د دې هېواد بچیانو ته د خدمت او سلامتیا لپاره روزنه ورکوو او ټولنې ته یې د چوپړ په موخه وړاندې کوو. ټولنه له مسلکي پولیسو پرته نیمګړې ده او همدا مسلکي پولیس دي،چې د خپل هېواد او هېوادوالو لپاره چوپړتیاوې کوي.»
د اسلامي امارت لوړ پوړو چارواکو په دغو مراسمو کې د ۳۵۰ زره وسله وال پوځ جوړولو خبره وکړه، او زیاته یې کړه،چې د هر ارګان منسوبین به په ځانګړي یونیفورم سمبال کړي.
د رئیس الوزرا دویم مرستیال عبدالسلام حنفي وايي:« د افغانستان اسلامي امارت د هېواد له جغرافیې د امنیت ساتنې او همدارنګه له اسلامي ارزښتونو او ځمکنۍ بشپړتیا د دفاع لپاره شااوخوا ۳۵۰ زره امنیتي ځواکونه په پام کې نیولي. وروڼو او خویندو! له دې وروسته ستاسې یونیفورم د بهرنیانو له لوري نه جوړیږي، ستاسې بودیجه دوی نه تصویب کوي، ستاسې دندې د دوی له خوا نه ټاکل کېږي.»
د پولیسو ملي اکاډمۍ د ۱۳ دورې تازه فارغ شویو افسرانو ته د امنیت، لوژیستیک، سرحدونو او جنايي برخو کې پنځه کلنې زده کړې ورکړل شوي دي.
افسران خوښ دي،چې زده کړې یې بشپړې شوې او خپلو خلکو او هېواد ته د خدمت لپاره وړاندې کېږي.
یو تن فارغ شوی فارغ شوی افسر وايي: « د خوشالۍ احساس لرم. موږ ډېر زحمت وګاله،شااوخوا پنځه کاله مو دلته زحمت تېر کړ،چې په منځ کې یې کورونا ناروغي او نورې رخصتۍ راغلې. دې ورځې ته په تمه وم،چې د فراغت محفل مو ونیول شي.»
د مسلکي کادرونو ګومارنه هغه غوښتنه ده، چې افغان ولس او نړیوال یې لري، کورنیو چارو وزارت هم مهاله په دې غونډه کې له فارغ شویو افسرانو ځینې افسران په لوړو دندو وګومارل او ډاډ یې ورکړ، چې دوی به نور د افغانستان په بېلابېلو ولایتونو کې پر دندو وګوماري.
