Skip to content
د کندهار د کرنۍ او مالدارۍ رياست مسوولين وايي،د دغه ولایت په ارغنداب،ډنډ،دامان، ژړۍ او پنجوايي ولسوالیو کې د کبانو د روزنې د صنعت په برخه کې پانګونه زياته شوې ده،چې ورسره د کبانو د غوښې په توليد کې هم زياتوالی راغلی.
د یاد رياست د ترويج د څانګې مشر انجنير محمدالله نوري وایي، په دغه ولایت کې د کبانو د روزنې ټول ۱۸۳۲ فارمونه شتون لري،چې ۱۸۲ يې تېر کال کې جوړ شوي دي.
نوري وایي، په کلني ډول د کبانو د روزنې له يادو فارمونو ۶۸۰۰ ټنه غوښه توليد کېږي، چې د کندهار ترڅنګ ځينو نورو ولایتونو ته هم وړل کیږي.
نوري زیاتوي:« په کندهار ولایت کې د کبانو ۱۸۳۲ فارمونه جوړ شوي دي. د تېر کال احصایې پر اساس په یوه کال کې ۱۸۲ فارمونه مو رسمي جوړ کړي او ثبت کړي. له دغو ټولو فارمونونه په کال کې په منځنۍ کچه شااوخوا ۶۸۰۰ ټنه غوښه تر لاسه کیږي. دا غوښه سربېره پر دې،چې کندهارر کې مصرف کېږي، نورو ولایتوته ته هم په ژوندۍ او مړه ډول استول کیږي.»
په ورته وخت کې نوري په کندهار کې د کبانو د روزنې صنعت د پراخېدو علت د دغه صنعت لپاره د امکاناتو زياتوالی په ګوته کوي.
هغه زیاته کړه:« په کندهار کې د کبانو فارمونو زیاتوالي علت دا دی،چې دلته اسانتیاوې موجود دي. د کبانو د تولید مرکزونه، د کبانو بچیانو عرضه کول،همدارنګه له فارم لرونکو بېرته غوښه همدغه شرکتونه اخلي. شرکتونه یې بیا نورو ولایتونو ته استوي، نو له همدې امله په کندهار کې دغه کاروبار ښه روان دی او کامیابه دی.»
بل لور کندهار کې د کبانو روزنې او پلورنکي هم خپل کاروبار کې د زياتوالي او ګټي خبره کوي.
د کبانو پلورونکی شفیع الله بیا وايي:« موږ کارتنونه راوړو. په دغه ځای کې بیا کبان بیا هټۍ والو ته ورکوو. هټۍ وال یې بیا په ښار کې پلوري. »
د کبانو بيچان،چې وړاندې له ګاونډيو هېوادونو راوړل کېدل،اوس پر کور دننه د کبانو نسلونو له تکثري فارمونه ترلاسه کیږي،چې دې چارې هم هېواد کې د کبانو د روزني پر صنعت مثبت اغېز کړی.
