د اطلاعاتو او فرهنګ وزارت وایي، د رسنیو او خبریالانو د ملاتړو بنسټونو له ډلې یې د درېیو هغو جوازونه تمدید او د پاتې نورو يې د خبریالانو پرلهپسې شکایتونو او غیرمسلکیتوب له امله لغو کړي دي.
د دې وزارت چارواکي زياتوي، په هېواد کې د رسنیو او خبریالانو د ملاتړ بنسټونو هر اړخیزه ارزونه شوې او په پایله کې یې یوازې درېیو بنسټونو ته د فعالیت اجازه ورکړل شوې ده.
د اطلاعاتو او فرهنګ وزارت چارواکي زیاتوي، دا ارزونه د خبریالانو او رسنیو د پرلهپسې شکایتونو له ارزولو وروسته شوې او څرګنده شوې چې د ډېرو بنسټونو مسوولینو د غیرمسلکیتوب له امله، د خبریالانو او رسنیو ستونزو ته حل په ځای، هغوی ته ستونزې زیږولې دي.
د اطلاعاتو او فرهنګ وزارت وياند خبیب غفران وايي: « د رسنیزو ملاتړ بنسټونو پر وړاندې د خبریالانو او رسنیو د پرله پسې شکایتونو او د اطلاعاتو فرهنګ وزارت د ارزونو پلان له مخې، جوته شوه چې د رسنیو ملاتړ بنسټونو کثرت، د دغو بنسټونو د مسوولینو غیر مسلکيتوب، نه یوازې دا چې د خبریالانو او رسنیو ستونزې نه دي حل کړې بلکې د دغو نهادونو نړیوال اعتبار او حیثیت ته یې زیان هم اړولی دی. په دې کې داسې بنسټونه هم وو چې له څه مودې راهیسې یې فعالیتونه درېدلي وو.»
د افغان خبریالانو او رسنیو ملاتړ بنسټ، افغان مطبوعاتي مرکز او د خبریالانو د خوندیتوب کمېټه هغه درې بنسټونه دي چې د فعالیت جوازونه یې تمدید یا غځول شوي دي.
د افغان خبریالانو خوندیتوب کمېټه وایي، هڅه کوي د تېر په څېر د افغان خبریالانو او رسنیو ملاتړ او فعالیت په برخه کې رغنده رول ولوبوي.
د افغان خبریالانو خوندیتوب کمېټې ریيس جمیل وقار وايي: « د افغان خبریالانو خوندیتوب کمېټه هغسې چې په تېرو ۱۷ کالو کې یې د رسنیو د ملاتړ لپاره کار کړی، بیاهم ژمنه کوي چې په افغانستان کې د رسنیو د تقویې او خبریالانو د ملاتړ لپاره مسوون چاپېریال رامنځته او د ظرفیتونو لوړولو په برخه کې خپلو هڅو ته ادامه ورکړي او دغه راز دوی ته د فعالیت ښه زمینه برابره کړي.»
د اطلاعاتو او فرهنګ وزارت دغه راز وایي، یادو بنسټونو په نړیواله کچه د افغانستان د رسنیزو بنسټونو باور ته زیان رسولی و او یو شمېر یې له څه مودې راهیسې غیرفعال وو.
ځينې خبریال د اطلاعاتو او فرهنګ وزارت له دې تازه ګام هرکلی کوي او وایي، يو شمېر دا ډول بنسټونو یوازې د خبریال په نوم پروژې اخستې، خو دوی ته یې حقونه نه ورکول.
خبریال عبدالرقیب سایل وايي: « موږ د اطلاعاتو او فرهنګ وزارت دا پرېکړه ستایو؛ ځکه له دې وړاندې د افغان خبریالانو په نوم ملاتړ ادارو هېڅ ډول خدمت نه و کړی او لا یې په اړه د خبریالانو شکایتونه موجود وو. دوی د خبریالانو حقونه ضایع کول او حتا خوړل یې.»
خبریال احسانالله ولسمل وايي: « یوه اساسي ستونزه دا ده چې د دې بنسټونو شمېر ډېر دی، هم د هېواد په داخل او هم بهر کې ګڼ شمېر دا ډول بنسټونه شته. اساسي ستونزه دا ده چې خبریالانو ته یې په درد نه دي خوړلي. موږ تاسو ولیدل چې ځینو بنسټونو د خبریالانو او رسنیو په نوم پروژې راوړې، خو د خبریالانو او رسنیو هېڅ ډول درد یې دوا نه کړ.»
د اطلاعاتو او فرهنګ وزارت هم په دې اړه خپره کړې خبرپاڼه کې ویلي، یادو مواردو ته په کتو د دې وزارت رهبرۍ پرېکړه کړې چې د هېواد په کچه یوازې د درېیو بنسټونو جوازونه تمدید او د پاتې هغو جوازونه لغو کړي.
د اطلاعاتو او فرهنګ وزارت دغه راز ویلي، یاده پرېکړه به له یوې خوا د خبریالانو او رسنیو د حقوقو پر خوندیتوب سربېره، د خبریالانو او رسنیو په نوم د ناوړه ګټېاخستنې مخه ونیسي او له بلې خوا به د ملاتړ بنسټونو فعالیتونه ګټور او منظم شي.
