د بریښنا شرکت وايي، د متحده عربي امارتو(اېچاېچاېم)کمپنۍ په افغانستان کې د شاوخوا ۱۰۰۰ مېګاواټه برېښنا د تولید په برخه کې پانګونې ته لېوالتیا ښودلې.
د برېښنا شرکت عمومي اجراییوي ريیس ملاعبدالحق همکار د دوشنبې په ورځ په خپل دفتر کې د متحده عربي اماراتو د اېچاېچاېم شرکت له رییس تانکوت داشدمیر سره په افغانستان کې له ګازو څخه د برېښنا تولیدولو په برخه کې د پانګونې په اړه خبرې کړې دي.
برېښنا شرکت پر خپله فېسبوک پاڼه لیکلي، په دې لیدنه کې د برېښنا شرکت عمومي اجراییوي رییس په افغانستان کې د برېښنا تولیدولو برخه کې پانګونې لپاره د برابر شویو شرایطو په اړه خبرې کړې او د یاد شرکت رییس ته یې په دې برخه کې د هر ډول همکاریو ډاډ ورکړی.
برېښنا شرکت لیکلي، د متحده عربي اماراتو یاد شرکت له ګازو څخه د برېښنا تولیدولو په برخه کې په لومړي پړاو کې د ۱۰۰۰ مېګاواټه په ظرفیت د برېښنا تولیدولو برخه کې پانګونې ته خپل چمتووالی ښودلی.
د افغانستان برېښنا شرکت دغه راز وايي، د برېښنا د تولید په برخه کې د پانګونې لپاره دا ډول هڅې د انرژۍ سکټور پرمختګ او د برېښنا د تولید په برخه کې پر ځان بسیاینې لپاره مهم ګام دی.
