Skip to content
د ژغورنې نړیوالې ډلې یو ځل بیا د افغانستان پر روان اقتصادي او بشري وضیعت اندېښنه ښودلې او منلې یې ده،چې د نړیوالې ټولنې پام له دې هېواده اکراین ته اوښتی دی.
دغې ډلې پر نړیوالې ټولنې غږ کړی،تر څو د لوږې مخینوي، د خلکو د ژوند ژغورلو د افغان ښځو او نجونو د ژوند ښه کېدو لپاره په افغانستان کې له رامنځته شوي فرصت ګټه واخلي.
د یادې ډلې مرستیالې امانډا کاټانزانو له افغانستان سره شوې وروستی مرستې ستایي او باوري ده،چې د روان وضیعت په مهار به مثبت اغیز ولري.
کاټانزانو زیاتوي:« موږ په افغانستان کې د روان وضیعت د خطرونو راکم کولو په موخه د امریکا او مرستندویه هېوادونو وروستي اقدامات ستایو. موږ د نړیوال بانک هغه وروستی اقدام هم ستایو،چې د افغانستان د بیارغونې له وجهي صندوق څخه یې یو میلیارد ډالر آزاد کړل، تر څو د ملګرو ملتونو مرستندویه ادارو له خوا ولګول شي»
نوموړې دغه راز د دغو پیسو په اړه غوښتنه کړې،چې سمدستي دې وویشل شي او د هغو روغتیایي کارکوونکو او ښوونکو معاشونه دې ورکړل شي،چې له څو میاشتو راهیسې یې معاشونه نه دي اخېستي.
په ورته وخت کې کاټانزانو پر افغانستان د امریکا لخوا د لګېدلو مالي محدودیتونو د نرمولو هرکلی کړی او غوښتنه یې کړې،چې د افغانستان بانک سره باید د اقتصادي او پولي ثبات ساتلو په موخه په تخنیکي برخو کې هم مرستې وشي.
هغه زیاته کړه:«د نړیوال بانک له وروستي اقدام سربېره د امریکا له خوا د محدودیتونو نرمول به پر خصوصي سکتور مالي اغیزې کمې کړي. د امریکا دا اقدام به افغانستان ته د خوړو،تیلو،بریښنا او نورو توکو وارد کولو زمینه برابره کړي. دا پریکړې د افغانستان په څېر د یو ه وارداتي هېواد لپاره خورا اړینې دي.»
کاټانزانو ویلي، د افغانستان په اړه په راتلونکو جوړېدونکو غونډو کې باید تمرکز د روان بشري ناورین پر مهار او راتلونکو پلانونو وي.
هغې ویلي، د افغانستان له مرکزي بانک سره تخنیکي مرستې او د دې هېواد کنګل شویو پیسو په اړه د پلانونو جوړلو باید د نړیوالې ټولنې له تر ټولو اړینو اجنډاوو وي.
