د ژمي په دې سړه هوا کې دا تاوده تفتونه پېرودونکي د ځان په لور راکاږي. دا د سړک پر سر د هغو پخېدونکو خواړو تفت او بړاس دی چې خلک يې زیات خوښوي. ممکن د خوښولو يو لامل یې ټيټه بيه هم وي، خو ډېری پېرودونکي یې بیا د ژمي سړه هوا په ګوته کوي.
خلک دلته یوازې په ۲۰ یا ۵۰ افغانیو کولی شي د سړک پر سر خواړه وپېري او ځان پرې موړ کړي.
د کابل اوسېدونکی عزیزالله وايي: « هوا سړه وه او چې دا تودې پراټې مې وخوړې، ایله پرې تود شوم. زه هر سهار چای له پراټو سره خورم..»
د پراټو پخولو تبۍ ته ولاړ فضل مولا وايي، له څو کلونو راهیسې هر سهار د شېدو چای له پراټو سره پلوري. ۳۰ کلن فضل مولا زیاتوي، هره ورځ له ۱۰۰ تر ۲۰۰ پراټې او په همدې اندازه د شیدو چای پلوري او د کورنۍ ګوزاره یې پرې روانه ده.
په کابل کې د وروستۍ واورې له ورښت وروسته د فضل مولا روزګار نور هم ښه شوی او وايي، په یخه هوا کې د ده پخو کړو تودو پراټو ته خلک په کتار کې ولاړ وي.
د پراټو پلورونکی فضل مولا وايي: « زه سهار وختي شپږ بجې له کوره راوځم او تر یوولس بجو کار کوم. د هوا له سړېدو سره زما کاروبار ښه شوی؛ په اوړي کې هم کاروبار ښه وي، خو ژمي کې د سړې هوا له امله زموږ پراټې او د شیدو چای ډېر مینه وال لري.»
خواړه پلورونکی نصرت لغمانی وايي: « کاروبار ښه دی، شکر دی روزي پیدا کوو. هوا سړه شوې او له دې امله زموږ فروشات زیات شوي.»
خواړه پلورونکی امجد شینواری وايي: « له ماسره چېپس دی، برګر دی او پکوړې دي. شکر ښه دی، کاروبار مې چلېږي.»
د سړک پر سر خواړه نه یوازې په کابل کې بلکې د زیاتو هېوادونو په مشهورو ښارونو کې هم پلورل کېږي او بې شمېره خوښوونکي لري. د کابل اوسېدونکو په خبره، دا خواړه چې بېلابېل ډولونه لري، دوی یې په ارام او ډاډه زړه خوري.
