د جلال اباد ښار اوسېدونکي د دې ښار د حلقوي سړک د دویمې لیکې جوړولو کار د بیا پیل او بشپړولو غوښتنه کوي.
د دې حلقوي سړک د دویمې لیکې د جوړولو کار چې شاوخوا یو کال مخکې پیل شوی و، اوس مهال دریدلي او چارواکي یې لامل د بودیجې کمښت بولي.
د ښار اوسېدونکي دېته په کتو چې حلقوي سړک په ښار کې د ګڼه ګوڼې او ټرافیکي پېښو په کنټرول کې مهم رول لري، پر ژر جوړېدو یې ټینګار کوي.
د جلال اباد ښار اوسېدونکی عبد الله وايي: « که د حلقوي سړک چارې ګړندۍ شي، یو خو به د ښار بیروبار کم شي بل به د ښار نظم هم ورسره برابر شي.»
د جلال اباد ښار اوسېدونکی محمد یوسف وايي: « د حلقوي سړک چې له سرخ آب پله څخه پيل کېږي، کارونه یې څو ځل پيل شو، خو بېرته ودرېدل. موږ نه پوهېږو مشکل څه دی. هیله لرو هرڅومره ژر چې کېږي، چارې یې بشپړې شي.»
د جلال اباد ښار حلقوي سړک ۱۲ کیلومتره اوږدوالې لري او ۴۰ متره پلن دی.
د ښار اوسیدونکي وايي، که دا سړک جوړ شي، په ښار کې موجوده ګڼه ګوڼه او بې نظمي چې د نفوسو زیاتوالی او د ښار تنګ سړکونه یی اصلي لاملونه دي، کمولی شي.
د جلال اباد ښار اوسېدونکی قدرت الله وايي: « ښار کې ډېر زیات بیروبار دی چې له یوه ځای بل ځای ته ځې، په ساعتونو کې نه شې رسېدای. له دې سړک سره به د سیند غاړې ښکلا هم برابره شي او خلکو ته به ډېر سهولتونه برابر شي.»
د جلال اباد اوسېدونکی ایاز خان وايي: « حلقوي سړک ډېر مهم دی، باید پرې کار وشي، ترڅو د ښار ګڼه ګوڼه ووېشل شي.»
د جلال اباد ښاروالي بیا وايي، د حکومت مشرتابه ته یې د حلقوي سړک د کار د بشپړولو لپاره د بودیجې وړاندیز کړی او د بودیجې له ترلاسه کولو وروسته به د حلقوي سړک د پاتې برخې د بشپړولو کار بېرته پیل کړي.
د جلال اباد ښاروالۍ د تخنیکي او سکټوري چارو رییس انجینیر وحید الله مخلص وايي: « باید ووایم چې حلقوي سړک یوازې د ننګرهار لپاره نه بلکې د ټول ختیځ لپاره یوه لویه پروژه ده، نو لګښت یې هم ډېر دی او ښاروالي نه شي کولی دا لګښتونه پوره کړي. په دې اړه له مشرتابه سره خبرې شوې، هیله لرو چې هغوی بودیجه په واک کې راکړي او موږ د کارونو پيل کولو زېری درکړو.»
د جلال اباد ښار حلقوي سړک دویمه لیکه چې ۴۰متره پلنوالی او ټولټال ۲۱ کیلومتره اوږدوالی لري، د جوړېدو چارې یې په درېیو فازونو کې د ښار اوومې ناحیې اړوند ځنګل باغ سیمې څخه تر ثمرخیلو پورې د سیند په مسیر کې پلان شوې دي.
