له کلونو انتظار وروسته د هرات لوی جامع جومات پارک د بیارغونې کار بشپړ شو.
د هرات اطلاعاتو او فرهنګ ریاست چارواکي وايي، د دې پارک د بیارغونې کارونه د ترکیې د همکارۍ او همغږۍ موسسې(تیکا) په همکارۍ په درېیو میاشتو کې بشپړ شوي.
د دوی په وینا، دا پارک چې په هرات کې د لرغونو اثارو یوه برخه ده، په ۹ زره ۴۰۰ مټر مربع ساحه کې جوړ شوی.
د چارواکو په خبره، اوس مهال د هرات د ځینو نورو لرغونو اثارو لکه د هرات لوی جامع جومات د ځینو برخو، د هرات ارګ یا اختیارالدین کلا، هرات منارونو او د خواجه عبدالله انصاري زیارت د بیارغونې کارونه هم روان دي.
د هرات اطلاعاتو او فرهنګ رییس احمدالله متقي وايي: « د هرات لوی جامع جومات د پارک بیارغولو کار چې درې میاشتې وړاندې پيل شوی و، اوس د پای ته رسېدو په حال کې دی. باید ووایم چې د لوی جامع جومات په نورو برخو کې هم د بیارغونې کارونه جریان لري. همدارنګه د جامع جومات ترڅنګ د اختیارالدین کلا، هرات منارونو او د خواجه عبدالله انصاري د زیارت بیارغونې کارونه هم ادامه لري.»
په ورته مهال، د فرهنګي چارو شنونکي باور لري چې د هرات لوی جامع جومات د پارک رغول او د نورو لرغونو ابداتو مرمت او بیا رغونه به په دې ولایت کې د ګرځندوی صنعت د ودې لامل شي.
د دوی په خبره، دا ډول پروژې کولی شي کورني او بهرني سیلانیان هرات ته راجلب کړي او د اقتصادي فعالیتونو د پیاوړتیا سبب شي.
د فرهنګي چارو کارپوه محمد صدیق میر وايي: « دغه پارک له اوږدې مودې راهیسې د کنډوالې په شان و او موږ له دې امله ډېرې اندېښنې هم لرلې. دا چې هرات یو تاریخي ولایت دی او ډېر زیات سیلانیان لري، نو اړتیا وه چې دغه پارک له ویجاړ حالت څخه ووځي او هسې جوړ شي چې اړتیا یې ده.»
بله خوا، د هرات ځایي اوسېدونکي هم د یاد پارک له جوړېدو خوښي څرګندوي، خو له مسوولینو غواړي چې د هرات لوی جامع جومات نورې برخې چې اوسمهال بیارغونې ته اړتیا لري، پر وخت ورغوي؛ ترڅو له احتمالي زیانونو څخه خوندي پاتې شي.
د هرات اوسېدونکی عبدالحنان وايي: « دا ډېر ښه کار وشو چې دا پارک یې جوړ کړی. اوس خلک د تفرېح لپاره راځي او خوند اخلي. خدای وکړي چې پاتې برخې یې هم جوړ شي.»
د هرات اوسېدونکی وحید احمدي وايي: « له دې وړاندې به چې د جامع جومات پارک ته ننوتو، هره خوا کثافات وو، سرسبزي نه وه او هرڅه ویجاړ وو. اوس ډېر ښه شو، خو که پاتې برخو ته یې هم پاملرنه وشي، لا ډېر به ښه شي.»
د یادونې وړ ده چې د هرات لوی جامع جومات شاوخوا ۴۶ زره او ۷۰۰ مترمربع مساحت لري او د دولسمې میلادي پېړۍ پر مهال د سلطان غیاثالدین غوري له لوري جوړ شوی چې وروسته بیا د تیموریانو او صفویانو د واکمنیو پر مهال بیا بیا رغول شوی او تر نن پورې د هرات له مهمو تاریخي او فرهنګي نښو څخه ګڼل کېږي.
