د افغانستان لپاره د بریټانیا ځانګړی استازی دا مهال په اسلاماباد کې د اسلامي امارت پر سفير سربېره، له ځينو پاکستاني چارواکو سره په ليدنو بوخت دی.
ریچارډ لېنډسي پرخپله اېکس پانه لیکلي، د اسلامي امارت له سفير سره يې د سيمې پر امنيتي مسايلو سربېره، افغانستان کې د ښځو او نجونو په اړه د حکومت د پالیسيو پر اغېزو هم خبرې کړې.
د افغانستان لپاره د بریټانیا ځانګړي استازي وړاندې لیکلي: « په پاکستان کې د افغانستان له سفیر سردار احمد شکیب سره په لیدو خوښ شوم. موږ د سیمهییزو امنیتي مسایلو او د ښځو او نجونو په اړه د اسلامي امارت د پالیسیو د اغېز په اړه بحث وکړ.»
په اسلاماباد کې د اسلامي امارت سفارت بيا د دې ليدنې په اړه جزیيات نه دي خپاره کړي او نه هم حکومت د ښځو او نجونو په اړه پر بحث شویو مسايلو نظر څرګند کړی.
خو له دې وړاندې چارواکو ډاډ ورکړی چې د ښځو ټول حقونه تامين شوي او ان تر دې چې هغه حقونه هم ورکړل شوي چې په خبره يې، وړاندې ترې محرومې وې.
بله خوا، ځينې زده کوونکې نجونې تمه لري چې راتلونکي پسرلي کې به له شپږم ټولګي پورته د تعليم او تحصيل اجازه ورکړل شي.
همدارنګه، د افغانستان لپاره د بریټانیا ځانګړي استازي په اسلاماباد کې د افغانستان لپاره د پاکستان له ځانګړي استازي سره هم ليدلي او د افغانستان پر اړوند مسايلو یې ورسره خبرې کړې.
د افغانستان لپاره د پاکستان ځانګړي استازي محمد صادق خان د دې لیدنې په اړه ویلي: « موږ د وروستیو سیمهییزو امنیتي پرمختګونو او پراخو امنیتي ننګونو په اړه هم نظرونه تبادله کړل. موږ د ګډو اندېښنو د حل او سیمهییز ثبات د ودې لپاره د دوامداره همکارۍ او همغږۍ پر اهمیت ټینګار وکړ.»
شنونکي که څه هم تعليم او تحصيل د نجونو حق بولي، خو د دې مخالف دي چې په خبره يې، ځينې هېوادونه دې په ورته برخو کې د اندېښنو په مطرح کولو سره د افغانستان په کورنيو چارو کې د مداخلې هڅې وکړي.
د سیاسي چارو شنونکی ادریس محمدي ځاځی وايي: « نړۍ او د نړۍ مشران باید له افغانستان سره په داسې مسایلو خبرې وکړي چې حل او فصل یې نړیوال مشکل وي نه د افغانستان خپل داخلي مشکل. اسلامي امارت کورنۍ ستونزې له خپلو خلکو سره په مشوره حل کوي. نړیوال باید په دې هم فکر وکړي چې د افغانستان ملت د دوی د بندیزونو او محدودیتونو له امله ستونزو سره مخ دی.»
له دې وړاندې حکومت هم د ښځو او نجونو د حقونو اړوند مسايل کورني ياد کړي او د ځينو هېوادونو له لوري يې په مکرره توګه مطرح کېدل، په کورنيو چارو کې د مداخلې هڅه بللې.
