د صنعت او سوداګرۍ وزارت یو پلاوی چې د بنګله دېش د سوداګرۍ په نړیوال نندارتون کې د ګډون لپاره دا مهال په پلازمېنه ډاکه کې دی، د دې نندارتون په څنډه کې یې د بنګله دېش د صادراتو پراختیا ادارې له رییس سره کتلي.
د چارواکو په خبره، په دې کتنه کې د دواړو هېوادونو ترمنځ د سوداګریزو او اقتصادي اړیکو د پراختیا پر څرنګوالي خبرې شوې او بنګله دېشي لوري افغانستان ته د درملو د منظمو صادراتو ډاډ ورکړی.
د کابل او اسلام اباد ترمنځ د سوداګریزو او اقتصادي اړیکو له منځه تلو وروسته، بنګله دېش هم له افغانستان سره د سوداګرۍ او اقتصادي اړیکو د پراخولو په برخه کې لېوالتیا ښودلې.
د صنعت او سوداګرۍ وزارت معیین چې د یوه پلاوي په مشرۍ د بنګله دېش د سوداګرۍ په نړیوال نندارتون کې د ګډون لپاره دا مهال په ډاکه کې دی، د دې نندارتون په څنډه کې یې د بنګله دېش د صادراتو د پراختیا د ادارې له رییس محمد محسن عارف او یو شمېر نورو چارواکو سره لیدلي.
د صنعت او سوداګرۍ وزارت ویاند وايي، په دې لیدنه کې د کابل او ډاکې ترمنځ د سوداګرۍ او اقتصادي اړیکو د پراختیا پر لارو چارو او افغانستان ته په منظم ډول د درملو په صادراتو هر اړخیزې خبرې شوې.
د صنعت او سوداګرۍ وزارت ویاند اخوندزاده عبدالسلام جواد وايي: « په دې لیدنه کې بنګله دېشي اړخ افغانستان ته د معیاري او باکیفیته درملو صادرولو ته چمتوالی اعلان کړ. افغان پلاوي له بنګله دېش څخه د درملو او طبي محصولاتو واردات د افغانستان روغتیايي اړتیاوو لپاره مهم وګڼل او د دواړو هېوادونونه اقتصادونه یې د یو بل بشپړوونکي وګڼل. د ناستو په پایله کې دواړو لورو هوکړه وکړه چې د اړیکو کچه له دوستانه څخه د عملي اقتصادي مشارکت سطحې ته لوړه کړي؛ ترڅو له دې لارې د سوداګرۍ کچه لوړه شي، متقابل اعتماد زیات او دواړو لورو ته د ښکاره اقتصادي ګټو زمینه برابره شي.»
د صنعت او سوداګرۍ وزارت ویاند دغه راز وايي، ډاکې ته د افغان پلاوي د سفر پر مهال د بنګله دېش د البسو او جامو د تولید او صادراتو ټولنې له مشر او غړیو سره هم لیدنې شوې او د افغانستان د پنبې د پېرلو او په افغانستان کې د ټوکر د تولید په برخه کې د پانګونې په اړه خبرې شوې.
له بل لوري، یو شمېر څارونکي په دې باور دي چې دا ډول سفرونه او لیدنې کولی شي د افغانستان د سوداګریزو اړیکو په پراختیا او دغه راز په کور دننه د تولیداتو لپاره د بازار موندلو په برخه کې مرسته وکړي.
د اقتصادي چارو کارپوه عبدالنصیر رښتیا وايي: « په هغه صورت کې چې دا ډول اړیکې لا زیاتې شي او موږ بنګله دېش ته پنبه صادره کړو، بېله شکه چې دا کار به د کرنې په برخه کې لوی تحول رامنځته کړي. موږ کولی شو له هغې خوا د افغانستان د اړتیا وړ توکي وارد کړو. زه فکر کوم دا ډول اړیکې او له لرې ګاونډیو هېوادونو سره د پیاوړو اړیکو جوړول کولی شي افغانستان ته ډېره ګټه ورسوي.»
په ورته مهال، یو شمېر نورافغان کتونکي، د افغانستان او پاکستان ترمنځ د سوداګریزو لارو تړل کېدو ته په اشارې وايي، بنګله دېش د پاکستان په ځای د سوداګریزې راکړه ورکړې لپاره یو ښه بدیل ګرځېدلی شي.
دوی وايي، په اوسنیو شرایطو کې له بنګله دېش سره د سوداګرۍ، اقتصادي او ټرانزیټي اړیکو پراخول د افغانستان په ګټه دي.
د نړیوالو اړیکو کارپوه سمیر انګار وايي: « دا ډول ګډون د باور فضا پياوړې کوي او د دې سبب کېږي چې افغانستان ځان د یوه مهم اقتصادي شریک په توګه نورو هېوادونو ته ور وپېژني، د پانګونې او سوداګرۍ دروازې پرانیزي او په دې سره د افغانستان او نورو هېوادونو اړیکې عادي کړي.»
د یادونې وړ ده چې د صنعت او سوداګرۍ وزارت معیین چې د یوه حکومتي پلاوي مشري کوي، د روانې جنورۍ میاشتې له ۱۸مې نېټې څخه په ډاکه کې دي.
د یادونې وړ ده د افغان سوداګرو ۵۰ کسیز ګروپ هم په دې سفر کې د افغان پلاوي ملتیا کوي.
