د چین د بهرنیو چارو وزارت په کابل پر يوه رسټورانټ له چاودنې وروسته چې د دغه هېواد يو وګړی پکې وژل شوی او ۲۰ نورو کسانو ته پکې مرګ ژوبله واوښته، په افغانستان کې د خپلو وګړو د لا زیات خوندیتوب غوښتنه کړې ده.
بېجېنګ له اسلامي امارت غوښتي چې په افغانستان کې د چینايي وګړو، د دغه هېواد پروژو او بنسټونو په امنيتي خونديتوب کې جدي ګاومونه واخلي.
دچین بهرنیوچارو وزارت ویاند ګوجیاکون وايي: « چین هر ډول ترهګري په کلکه غندي او مخالفت یې کوي. بېجېنګ له افغانستان او د سیمې له هېوادونو سره د ترهګرۍ پرضد ګډې مبارزې ملاتړ کوي او له افغان حکومت غواړي، چې د هغو چینايي وګړو، چې په افغانستان کې په پراختیايي پروژو کې د کار کولو لپاره حضور لري او په دغه هېواد کې د چینايي بنسټونو د امنیت ټینګښت په برخه کې جدي ګامونه پورته کړي.»
په همدې حال کې اسلامي امارت وايي چې په کابل کې د چاودنې عاملان نيسي او مجازاتوي يې. کورنیو چارو وزارت ټولو بهرنیو وګړو، په کابل کې سیاسي استازولیو او په تیره بیا هغو بهرنیو وګړو ته چې په افغانستان کې پیل شویو سترو پروژو کې کار کوي د امنیتي خونديتوب ډاډ ورکوي.
د کورنیوچارو وزارت ویاند عبدالمتین قانع وايي: « موږ ټولو ته ډاډ ورکوو او په ځانګړي ډول بهرنیو وګړو، سیاسي استازولیو چې دلته او هغه سترې پروژې چې په افغانستان کې پیل شوې د ټولو امنیت په ښه ډول تامینېږي.»
شنونکي بیا وايي، په دې وروستیو کې د افغانستان او ځینو هیوادونو ترمنځ سیاسي اړیکې پراخې شوې او دغه څه ځيني استخباراتي کړۍ نشي زغملای.
دوي وايي نړۍ اوس په دې پوه شوې چې په افغانستان کې سراسري امنیت ټینګ شوی خو په کابل کې وروستۍ چاودنه هغو استخباراتي کړیو کار دی چې غواړي له دغې لارې له نورو هېوادونو سره د کابل اړیکې خرابې کړي.
د سیاسي چارو شنونکی شهزاده مسعود وايي: « نړۍ پر دې باندې اوس ښه پوهېږي چې په افغانستان کې امنیت تر بل هر وخت بهتره ده، ځینې وخت چې پېښې رامنځته کېږي نړۍ ورباندې پوهېږي چې دغه پېښې د کومو سیمهییزو استخباراتو کړیو له خوا کېږي، هغوی هڅه کوي چې د افغانستان کومې اړیکې د سیمې له سترو هېوادونو سره جوړ شوي دوی څرنګه د ناباور فضا رامنځته کړي، زما په اند د افغانستان ثبات او امنیت نه یوازې د افغانانو بلکې د ټولې سیمې په ګټه دی.»
د کابل په شهرنو کې د دوشنبې ورځې چادونې مسوولیت داعش ډلې منلی خو په تړاو يې د امنيتي ارګانونو پلټنې پای ته نه دې رسېدلي.
