د اطلاعاتو او فرهنګ وزارت چارواکي وايي، دا مهال په ټول هېواد کې د ځوانانو د وړتیاوو لوړولو او روزنې لپاره له ۲۰ زیات مرکزونه فعال دي.
د دوی په خبره، یوازې تېر میلادي کال ځوانان توانېدلي چې د فریلانس قراردادونو پر بنسټ، له ۲۰۰ زرو امریکايي ډالرو ډېر عواید لاسته راوړي.
په ورته مهال، یو شمېر فارغ شوي ځوانان بیا د دا ډول پروګرامونو د جوړولو هرکلی کوي او ترڅنګ یې له اسلامي امارت او نړیوالې ټولنې غواړي چې له ځوانانو ملاتړ زیات کړي.
د اطلاعاتو او فرهنګ وزارت د ځوانانو معینیت د پروګرامو تنظیموونکی حضرت الله شریفي وايي: « په ۲۰۲۵ کال کې د فریلانسېنګ له درکه د ټول افغانستان په کچه دغو ځوانانو تر ۲۰۰ زرو ډېر ډالر ګټلي. موږ په کندهار، ننګرهار، مزارشریف او نور ولایتونو کې دا ډول مرکزونه لرو او غواړو په ټولو ولایتونو کې یې جوړ کړو.»
له فریلانس پروګرام څخه فارغ شوی ځوان ذبیح الله شمیم وايي: « د اطلاعاتو او فرهنګ وزارت د ځوانانو چارو له معینیت څخه مو غوښتنه دا ده چې ځوانانو ته دا ډول او همدارنګه نور ګټور پروګرامونه چمتو کړي او له دې لارې د ځوانانو لاسنیوی وکړي.»
