اسلامي امارت د تاجیکستان هغه ادعا رد کړه چې وايي، له افغانستان سره پر پوله يې هغه څلور تنه وسله وال ترهګر وژلي چې غوښتل يې ياد هېواد ته ور واوړي.
تاجیکستاني رسنيو د دې هېواد ملي امنيت کمېټې له قوله راپور ورکړی چې د ياد هېواد د ختلان ولایت د شمسالدین شاهین ولسوالۍ اړوند، له افغانستان پر پوله يې دا کسان وژلي دي.
د تاجیکستاني رسنيو په راپورونو کې ويل شوي، دا کسان د افغانستان بدخشان ولایت د خواهان ولسوالۍ له دربندک کلي څخه د تاجیکستان خاورې ته ننوتي وو.
ایشیا پلس تاجیکستاني رسنۍ په یوه راپور کې ویلي: « دا پېښه د جنوري میاشتې په ۱۸مه نېټه د شپې شاوخوا ۱۲نيمې بجې د «یول» سرحدي قطعې اړوند سرحدي پوستې په مربوطاتو کې رامنځته شوې چې د ختلان ولایت په شمسالدین شاهین ولسوالۍ کې موقعیت لري. د چارواکو په وینا، دغه وسلهوال د افغانستان بدخشان ولایت د خواهان ولسوالۍ له دربندک کلي څخه د تاجیکستان خاورې ته داخل شوي وو.»
د افغانستان حکومت دا خبره نه مني چې ګني د افغانستان له خاورې دې کوم چا د وسلهوالو په توګه تاجیکستان ته د ور اوښتو هڅه کړې وي. د اسلامي امارت وياند وايي، په تېر کې هم د تاجیکستاني ځواکونو او قاچاقبرو ترمنځ نښتې شوې او اوسنۍ هغه هم د دواړو لوريو ترمنځ نښته ده.
ذبيحالله مجاهد زياتوي، د افغانستان حکومت د يادې پېښې په اړه پلټنې پيل کړې دي.
د اسلامي امارت ویاند ذبیح الله مجاهد وايي: « هو، موږ معلومات ترلاسه کړي چې هلته تاجیکستان سره په سرحدي سیمه کې د قاچاقبرو او د هغه هېواد د امنیتي ځواکونو نښته شوې. زموږ تحقیقات روان دي چې دا خلک څوک وو او څه یې قاچاق کول؛ خو دا خبره ښکاره ده چې دوی قاچاقبر وو. له تاجیکستان سره پوله کې کله کله داسې ستونزې پېښېږي او قاچاقبر په کې ښکېل وي. اسلامي امارت هم ګامونه اخیستي او هڅه کوو په دې اړه پلټنې ترسره شي.»
بله خوا، ځينې شنونکي د افغانستان له خاورې د ګواښوونو په اړه ورته ادعاوې بې اساسه بولي او زياتوي، دغه شان ادعاوې د اړيکو پياوړتيا لپاره مناسبې نه دي.
دوی له حکومت هم غواړي چې د ورته پلمو دفع کولو په موخه دې پر ډيورنډ فرضي کرښه او له نورو هېوادونو سره په سرحدونو کې امنيتي تدابیر زيات کړي.
د نظامي چارو شنونکی توریالی ځاځی وايي: « دغو هېوادونو ته د افغانستان هېڅ یوه خبره، حتا که سل په سلو کې ريښتیا هم وي، دوی ته د منلو وړ نه ده بلکې د هرې خبرې لپاره بهانې لټوي او د ځان په ګټه یې کاروي.»
د نظامي چارو شنونکی یوسف امین ځاځی وايي: « دا د حکومت دنده او مکلفیتونه دي چې د ګاونډیانو د تشویشونو لرې کولو لپاره کوټلي ګامونه پورته کړي. که دوی دا مسوولیت اداء نه کړي، د سیمې او نړۍ له نیوکو سره مخامخ کېږي.»
دا په داسې حال کې چې اسلامي امارت په دوامداره توګه د منځنۍ اسيا له هېوادونو سره د ټولو سرحدونو د امنيت او خونديتوب ډاډ ورکړی، خو وخت ناوخت تاجیکستان ادعا کوي چې د افغانستان له خاورې ورته خطر متوجه دی او په همدې موخه يې د جمعي امنيت تړون غړیو هېوادونه ته له افغانستان سره د خپلې پولې د تقويه کېدو وړانديزونه کړي.
