د پښتون ژغورنې غورځنګ وروستيو نيول شویو ۷ غړو له ډلې پينځه هغه يې د پاکستان له زندان څخه ازاد شوي

په پېښور کې د امن جرګې پرمهال د پښتون ژغورنې غورځنګ نيول شوي اووه کسيز پلاوي پنځه غړي د پاکستان له زندان څخه يکشنبه د شپې خوشي شوي.
د پښتون ژغورنې غورځنګ مشر وایي، په تازه خوشي شویو کسانو کې عدنان وزير، حبيب وزير، ګوهر، عرفان او فرمان شامل دي چې څه باندې دوې مياشتې يې زندان تېر کړ.
د منظوراحمد پشتین په خبره د پښتون ژغورنې غورځنګ دوه نور مخکښ غړي نورالله ترين او حنيف پشتين لا هم بنديان دي او د خلاصون پته يې نه لګېږي.
د پښتون ژغورنې غورځنګ مشر منظور احمد پشتین وايي: «موږ هیله لرو د نورالله ترین او حنیف پشتین، چې زمونږ د وطن او ملت په خاطر هر څه پخپلو وجودونو تېروي، د هغو لپاره به هم ټول پښتانه خپل مزاحمتي غږ او عملي مبارزه روانه وساتي.»
د پښتون ژغورنې غورځنګ مشر د تازه خوشي شویو کسانو د خلاصون لپاره د پوهنتون محصلانو، سیاسي څېرو او نورو سیاسي حرکتونو له هڅو مننه هم کړې.
بلخوا ټاکل شوې د جنورۍ په ۱۹مه د پښتون ژغورنې غورځنګ غړي او پلويان په سويزرلینډ کې د نړیوال اقتصادي فورم غونډې پرمهال اعتراض وکړي.
منظور احمد پشتین وایي، په دغې غونډه کې د امریکا او چین پر ولسمشرانو د پاکستان پر لومړی وزیر او د ياد هېواد پوځ پر مشر عاصم منیر سربېره د ۱۳۰ هېوادونو لوړپوړي چارواکي او وزیران ګډون کوي.
د پښتون ژغورنې غورځنګ مشر منظور احمد پشتین وايي: «هلته دا خلک په دروغه د بشري حقونو او جمهوریت په دعوه ځان نړۍ ته د یوه مشروع هېواد په توګه معرفي کوي. خو موږ باید د نړۍ په ګوټ ګوټ کې د دوی اصلي څېره نړۍ ته وښایو، چې دا یو استعماري نظام دی، د پښتنو قاتلان او د پښتونخواه د خاورې لوټماران دي. دوی یوازې یو کار په مخه اخیستې، هغه دا چې پښتانه تباه او برباد کړي، ډالر وګټي او معدنیات ولوټي.»
د پښتون ژغورنې غورځنګ ځینې نور غړي بیا وایي ترهغې چې خپله ازادي او سوکالي ترلاسه نه‌کړي مبارزې ته دوام ورکوي.
د پښتون ژغورنې غورځنګ د مشرتابه شورا غړی زبیر شاه اغا وايي: « نړۍ د پاکستان پوځي ادارو ظلم او جبر ته ګوري او پر وړاندې یې اقدام نه کوي، د پاکستان له لوري د ځوانانو نادرکه کول او پښتونخواه وطن کې پوځي عملیاتو، ډالري جنګ او ترهګرۍ ته دوام ورکولو پر خلاف پي ټي ایم به په سویس کې نړیوال فورم مخته احتیجاج کوي چې نړۍ څرګنده شي کوم پاکستان اقتصاد تاسو پیاوړی کوئ او دغه هېواد ځوانانو نادرکه کوي.»
د چارو څارونکي بیا وایي، پاکستان له کلونو راهیسې په خيبرپښتونخواه او قبايلو کې پر ولسي خلکو ظلم او زیاتي کوي او په خبره یې، د دغه ظلم او زور زیاتي پر وړاندې ډېر ځله نړیواله ټولنه او نور زبرځواک هېوادونه سترګې پټوي.
د سیاسي چارو شنونکی خلیل احمد نادم وايي: « د پښتنو حق غواړي او د ظلمونو پر وړاندې درېدلي دي او دوی مبارزه پر عدم تشدد ولاړه ده چې په نړۍ کې دغسې مبارزې منل کېږي او بریالي کېږي او که دوی د پاکستان حکومت او اسټبلیشمینټ پر وړاندې اعتراضونه کوي د دې لپاره دي چې دوی خپل حق غواړي.»
د پښتون ژغورنې غورځنګ مشر داسې مهال دغه څرکندونې کوي، چې له تېرو څو لسیزو راهیسې د پاکستان پوځ په خيبرپښتونخوا او قبايلي سیمو کې د ناامنۍ ختمولو په پلمه پوځي عملیات کوي او په ترڅ کې یې ولسي خلک په ځانګړي ډول ښځې او ماشومان په نښه کېږي.
د پاکستان پوځي رژیم د عملیاتو پر وړاندې ولسي خلک او نور ملت‌پال حرکتونه تل غږ پورته کوي او دا عملیات د لویدیځ په اشارې د پاکستان له لوري د بسپنې ترلاسه کولو پلمه او وسيله بولي.