کارپوهان: د روسیې ولسمشر پریکړو په اړه وړاندوینه سخته ده

د روسیې ولسمشر ولادیمیر پوتین له لوري د اټومي وسلې د تیارسئ خبرداری، پر نړیوال امنیتي ګواښ بدلیدوونکی دی.

د سیاسي چارو یو شمېر کارپوهان په دې اند دي، چې د پوتین تېرو پرېکړو او کارونو ته په کتو،د هغه د راتلونکو تحرکاتو په اړه وړاندوینه ګرانه ده.

دوی وايي،  د پوتین وروستی ګواښ باید بابیزه و نه ګڼل شي.

د سیاسي چارو شنونکی  طارق فرهادي وايي:« د پوتین د راتلونکو حرکاتو وړاندینه سخته ده. دا له ناټو او امریکا پورې اړه لري،چې څومره فشار پرې راوړي او دغه فشار څه ډول حس کوي او څه غبرګون ورته ښي

.اوس چې یې د اټومي وسلې د تیارسئ خبره کړې ده، دا خبره جدي ده،خو دغه خبره تر ډېره امریکا او اروپا ته متوجه ده او خطرونه یې درېیمې نړۍ ته متوجه نه دي، نو اوس دې مسایلو ته ډېر وخت شته دی.

یو شمېر نور بیا وايي،  د دغې خبرداري او ګواښ اغیز پر سیمه او په ځانګړې توګه د افغانستان په څیر د دریېمې نړۍ پر یوه هېواد څومره دی، اوس مهال دا لرې خبره ده.

دوی وايي،  لویدیځ او ناټو، پوتین دې ته اړ کړی،چې د اټومي وسلې د تیارسئ تر ګواښ ورسیږي او وايي،چې روسیه نه وي، ټوله نړۍ دې نه وي.

د سیاسي چارو شنونکی یحیی چاووش وايي:« اوس مهال چې د اوکراین او روسیې ترمنځ کومه جګړه دوام لري، اروپايي هېوادونه لکه انګلستان په دې اور کې تیل اچوي. اوس روسیه ځان داسې ګڼي،چې راتلونکي کې ښايي هېڅ روسیه نه وي نو پوتین وویل،چې روسیه نه وي،نو ټوله نړۍ دې نه اوسي.»

اخوا ځینې نور بیا په دې نظر دي،چې دا ډول ګواښونه د دوه زبرځواکو هېوادونو یا دوه بلاکونو زور ښودنه ده او افغانستان ته به یې له زیانونو لیرې وي.

د سیاسي چارو شنونکی  نوراحمد خالدي وايي:« نو دا  د پوتین خبرې، د اټومي راکټونو په اړه غرب ته او ناټو ته  یو خبرداری دی او ګواښ نه دی، چې موږ دا قدرت لرو،چې ټول غرب او امریکا له منځه یوسو. امریکا اوس له افغانستان وتلې، نو روسیه دا حق نه لري،چې افغانستان په نښه کړي.»

مسکو داسې مهال د لویدیځو پر وړاندې د اټومي وسلې د تیارسئ غږ کړی دی،چې له کییف سره یې کړکېچ تر دې دمه روښانه شوی نه دی او دغه غږ نړیوالو ته د سړې او دریېمې نړیوالې جګړې اندیښنې پیدا کړې دي.