نشنل انټرسټ امريکايي ورځپاڼه چې په نړيوالو اړيکو کې ژور مطالب او تحليلونه خپروي، په تازه خپور شوي تحلیل کې یې ويلي، امريکا دې د افغانستان اوسني حکومت په رسميت پېژندنه کې ځنډ نه کوي.
ورځپاڼې دغه راز ليکلي، امريکا د اسلامي امارت په اړه غلط او ناسم درک درلوده، ځکه یې له ويتنام وروسته په ۲۰۲۱ کال د اسلامي امارت له غورځنګ څخه ماتې وخوړه.
نشنل انټرسټ امريکايي ورځپاڼې لیکلي: « سیمه له جدي امنیتي او سیاسي بدلونونو سره مخ ده. هند او پاکستان په ۲۰۲۵ کال کې لنډه جګړه وکړه، د پاکستان او افغانستان اړیکې ترینګلې دي، ایران د اټومي پروګرام له امله تر فشار لاندې دی او مرکزي اسیا د چټکې اقتصادي ودې پړاو ته داخله شوې. د امریکا او افغانستان اړیکې د تېرو شلو کلونو په موده کې د ناسم درک له امله زیانمنې شوې وې او امريکا طالبان له داعش ډلې سره يو ډول ګڼل، حال دا چې اوس خپله د سي آی اې يوه چارواکیي ویلي، افغانستان له ۲۰۲۱ کال وروسته د لوېدیځ پر ضد د ترهګرۍ مرکز نه دی ګرځېدلی.»
نشنل انټرسټ ورځپانې په خپل تحلیل کې د افغانستان د بهرنیو چارو وزیر مولوي امیرخان متقي له لوري د امریکا او افغانستان د اړيکو نوي پړاو ته د داخلېدو اعلان، د واشنګټن لپاره د اړیکو د بیا رغولو لپاره یو مهم فرصت بللی.
ورځپاڼې په دې اړه لیکلي: « افغانستان دا مهال د سیمې د مهمو ټرانزیټي او اقتصادي پروژو په زړه کې ځای لري او له ډلې یې د افغان ټرانس ټرانسپورټي دهلېز، د ترمز او کابل– پېښور رېلپټلۍ، د ترکمنستان–افغانستان–پاکستان رېلپټلۍ او د ایران افغانستان– چین سټراټېژیک دهلېز پروژې د سیمې د اقتصادي نقشې د بدلولو ښکارندوي کوي.»
یادې ورځپاڼې په خپل راپور کې د روسیې له لوري د اسلاميامارت رسمیت پېژندنه هم مهمه بللې.
یوشمېر کارپوهان د نړیوالو ځینې غوښتنې د افغانستان کورني موضوعات ګڼي او په خبره یې، د ستونزو حل لپاره باید اسلاميامارت په رسمیت وپېژندل شي.
د نړیوالو اړیکو کارپوه سمیر انګار وايي: « که په کور دننه سیاسي او اقتصادي اصلاحات راوړل شي، اسلامي امارت د نړیوالې رسمیت پېژندنې سټېج ته رسېدای شي.»
واک ته د اسلاميامارت له بیا رسېدو وروسته، د نړۍ یو شمېر هېوادونو د افغانستان اوسني حاکمیت د رسمېت پېژندلو لپاره شرطونه او غوښتنې کېښودل چې د ښځو حقونو خوندیتوب، د ټولګډونه حکومت جوړېدل او له ترهګرۍ او نشه یي توکو سره مبارزه یې په سر کې دي.
د اسلامي امارت مرستیال ویاند له بېلابېلو هېوادونو سره مخامخ تعامل د رسمیت پېژندنې په مانا بولي، خو هیله لري چې د امریکا په شمول، ډېری هېوادونه اسلامي امارت په رسمېت وپېژني.
د اسلامي امارت مرستیال ویاند حمدالله فطرت وايي: « دا وخت راتلونکی دی او هر هېواد اړتیا لري چې د افغانستان له واکمن نظام سره رسمي تعاملات ولري؛ ځکه اوس د جګړې فصل ختم شوی او د تعامل او د سیاسي اړیکو جوړولو وخت دی. موږ ټولو هېوادونو ته بلنه ورکوو چې راشي او خپل سفارتونه دلته خلاص کړي او د افغانستان سفارتونه په خپلو هېوادونو کې خلاص کړي. که څه هم موږ همدا اوس عملا ً د سیمې او نړۍ له ګڼو هېوادونو سره سیاسي تعامل لرو او په یوه نا اعلان شوي رسمیت کې قرار لرو، خو نورو هېوادونو ته هم په کار ده چې د روسیې په څېر جرئت وکړي او د افغانستان اسلامي امارت په رسمیت پېژندلو اعلان وکړي.»
دا په داسې حال کې ده چې د تېر ۲۰۲۵ کال د جولای په درېیمه نیټه، د روسیې حکومت اسلاميامارت په رسمیت وپېژانده او تېره پنجشنبه د جنوري په پنځلسمه د روسیې ولسمشر ولاديمیر پوتین د اسلامي امارت د سفیر باور لیک هم ومانه.
