Skip to content
د ننګرهار ولایت په تورخم ښارګوټي کې د دوشنبې پر ورځ د « ۱۴۰۰ کال د کب پر ۹ مه» افغان او پاکستاني چارواکو ګډه ناسته کړې.
په ناسته کې د پاکستان سفیر منصور احمد خان په ګډون یو شمیر نورو پاکستاني چارواکو او لوړ پوړو افغان مسوولینو ګډون کړی و.
دغه ناسته کې پاکستاني لوري له افغان چارواکو سره د مرستو او همکاریو ژمنه وکړه.
د تورخم کمیسار شمشاد ته وویل، په یاده ناسته کې پاکستاني لوري له افغانستان سره د ۵۰ زره ټنه غنمو مرستې ژمنه وکړه.
کمېسار همدا راز زیاته کړې،چې په ناسته کې د دواړو هېوادونو د ښو اړیکو په دوام او همکاریو ټینګار وشو او افغان لوري له پاکستاني پلاوي غوښتنه وکړه،چې پر کړو ژمنو عمل وکړي.
په کابل کې د پاکستان سفیر وروسته له هغې تورخم ښارګوټي ته په سفر تللی،چې وړمه شپه یې په جلال اباد ښار کې د صنعت او سوداګرۍ خونې له مسولینو او ګڼو ولسي خلکو سره کتلي دي.
پاکستان داسې مهال له افغانستان سره د ۵۰ زرو ټنو غنمو مرستې ژمنه کوي،چې له کابو پنځه میاشتو راهیسې یې له خپلې خاورې د هند مرسته شوي غنمو لیږد ته اجازه نه ورکوله،خو دوه ورځې وړاندې د هند له خوا د مرسته شویو ۵۰ زرو ټنو غنمو لومړۍ جوپه په تورخم کې افغان مسولینو ته تسلیم شوه ،چې د افغانانو له تود هر کلي سره مخ شوه.
