Skip to content
د بشري مرستو د ویش پر دوام پکتیا کې ولایت کې د دوشنبې پر ورځ د « ۱۴۰۰ کال د کب پر ۹ مه» د لېوال خیریه بنسټ له لوري ۱۰۰ اړمنو کورنیو سره د خوراکي توکو مرسته وشوه.
د یاد بنسټ مسوولین وايي، دغه کورنۍ چې مرستې ورسره شوې، د بېلابېلو ولسوالیو دي.
دوی وايي،په نږدې ورځو کې به پر یو شمیر نورو اړمنو کورنیو هم ورته مرسته وویشل شي.
د لیوال خیریه بنسټ مشر طلاخان لېوال وايي:«تاسو ولیدل،چې دلته موږ د ۱۰۰ اړمنوکورنیو غړي دلته را وغوښتل. پر کونډو یتیمانو خوراکي توکي وویشل شول،چا چې مرسته رالیږلې،مننه ترې کوو.»
د دغو اړمنو کورنیو غړي چې ډېری یې بې سرپرسته دي وایي،تر دې وړاندې ورسره هیڅ ډول مرسته نه ده شوې او مسولې ادارې او مرستندویه بنسټونه دې ورسره مرسته وکړي.
د پکتیا یوه اوسېدونکې وايي:« تر اوسه پورې مو مرسته نه ده لیدلې،دا مو لومړی ځل دی. د هیڅ شي درک مو نه لګیږي. دا ژمی مو همداسې تیر کړ، اوس دلته راغلي یو،که څو مرسته راسره وکړي.»
د پکتیا یو بل اوسېدونکی بیا وايي:« موږ ډېر بې وزله یو. د هیڅ درک مو نه لګیږي. له دغو مرستو مننه کوو.باید نورې مرستې هم راسره وشي.»
د پکتیا یو شمیر اوسیدونکي له اسلامي امارته،سوداګرو او مرستندویه بنسټونو غواړي،چې دغه ولایت کې له اړمنو کورنیو سره د خوراکي توکو مرستې وکړي.
د پکتیا یو تن اوسېدونکی وايي:« له مسوولینو ، مسافرو او مرستندویه بنسټونو غواړو،چې پکتیا کې له بې وزله کورنیو سره مرسته وکړي.»
د پکتیا یو بل اوسېدونکی وايي:« زموږ غوښتنه دا ده،چې پکتیا کې بې وزله کورنۍ دې نه هیروي او خپلې مرستې دې ورته را واستوي.»
د دغو اړمنو کورنیو لپاره بهرنیو هېوادونو کې میشتو افغانانو پیسې راټولې کړي او د بنسټ له لوري یې پر بې وزله کورنیو خوراکي توکي وویشل.
