د افغانستان لپاره د روسیې ولسمشر ځانګړي استازي ویلي، د مسکو او واشنګټن ترمنځ د افغانستان په اړه مستقیم تماس یا خبرې نه دي شوي.
ضمیر کابلوف له روسي رسنیو سره خبرو کې زیاته کـــــړې، په ۲۰۲۳ زېږدیز کال هم د دواړو هېوادونو ترمنځ د خـــــــبرو هېڅ راز چینل موجود نه و او د وخت له امریکايي استازي توماس وېسټ سره هم په دې اړه خبرې نه کېدې.
نوموړي ټاس خبري اژانس ته ویلي، که څه هم په ۲۰۲۳ زېږدیز کال د ملګرو ملتونو د عمومي منشي په مشرۍ دوحه کې غونډه وشوه، خو ده او د چین استازي ونه منله چې له داسې هېواد سره په یوه پلاوي کې ځای ولري چې د افغانانو پیسې یې غلا کړې او بېرته یې نه ورکوي.
د افغانستان لپاره د روسیې ځانګړي استازي ضمیر کابلوف ویلي: « زه او امریکایي استازی ټوماس وېسټ هلته وو، خو باید یادونه وکړم چې ما او زما چینایي همکار چې د افغانستان لپاره د چین بهرنیو چارو وزارت ځانګړی استازی یو شیاویونګ دی، په واضېحو ټکو د ملګرو ملتونو سرمنشي انټونیو ګوټېرېش ته وویل چې موږ نه غواړو د یوه داسې هېواد له پلاوي سره و اوسو چې د افغان ولس پیسې یا سرمایه یې غلا کړې او بیرته یې نه ورکوي.»
ظاهراً د افغانستان لپاره د روسیې ځانګړی استازی په دې باور دی چې له افغانستان سره یې اړېکې په خپلواک ډول روانې دي او په دې برخه کې د لوېدیځو هېوادونو د اشارو پروا نه کوي.
د چارو څارونکي هم دې ټکو ته په اشارې وایي، روسیه هڅه کوي له افغانستان سره په خپلواک ډول اړیکې مخته یوسي او دا کار د دې سبب هم شوی چې دا هېواد د اسلامي امارت حکومت په رسمیت وپېژني.
د سیاسي چارو شنونکی ډاکټر معین ګل څمکنی وايي: « وروسته له هغې چې روسانو د افغانستان حکومت په رسمیت وپېژانده، مانا یې دا ده چې د لوبې اړخ بدل شو. زه فکر نه کوم روسان به د منځنۍ اسیا او روسیې پولو ته نږدې پروت افغانستان په سر په لویه او سټراټیژيکه کچه له امریکا سره بحث وکړي.»
د چارو یو شمېر نور څارونکي بیا پر اسلامي امارت غږ کوي چې د نړیوالو ګټو په چوکاټ کې له نورو هېوادونو سره اړیکې جوړې کړي، ترڅو دوی هم د روسیې په څېر د اسلامي امارت حکومت په رسمیت وپېژني.
د نړیوالو چارو شنونکی ډاکټر سمیر انګار وايي: « په اوس وخت کې نړیوال سیاست اقتصاد ته تسلیم دی. اسلامي امارت ته هم اړتیا ده چې پر تخنیکي تعامل او اقتصادي همکاریو تمرکز وکړي، ترڅو باور جوړ او تعاملات چټک شي.»
د افغانستان لپاره د روسیې ځانګړی استازی داسې مهال دا څرګندونې کوي چې واک ته د اسلامي امارت له رسېدو سره روسیه یو له هغو هېوادونو و چې په کابل کې یې خپل سفارت پرانیستی وساته او له اسلامي امارت سره یې اړیکې ورو ورو تر رسمیت پېژندلو ورسولې.
د افغانستان او روسیی د اړیکو په اړه دا څرګندونې داسې مهال شوې چې د اسلامي امارت چارواکي تمه لري په روان ۲۰۲۶ زېږدیز کال کې یو شمېر نور هېوادونه هم د افغانستان حکومت په رسمیت وپېژني.
