Skip to content
د ملګرو ملتونو وروستي راپور کې ویلي، په افغانستان کې اوس مهال شااوخوا ۴ میلیونه ماشومان له خوارځواکۍ له ګواښ سره مخ دي او مرستو ته ډېره اړتیا لري.
اخوا د سیاسي چارو کارپوهان بیا په دې اند دي،چې په تیرو شپږو میاشتو کې ډېرې مرستې شويؤخو ستونزه دا ده،چې مسوولو بنسټونو ته نه دي سپارل شوي.
د سیاسي چارو شنونکی نازکمیر زیارمل وايي:« د دغه وضعیت د کابو کولو لپاره په کار ده،چې نړیوال د ماشومانو په برخه کې مسوولو بنسټونو سره خورا ډېر کمک وکړي .د افغانستان اسلامي امارت ته هم په کارده،چې دغه مرستې پر اړمنو کسانو باندې وویشي،چې د دغه ناورین مخه ونیول شي.»
یو شمیر نور بیا پر اسلامي امارت غږ کوي،چې د بشري مرستو بهیر په سمه توګه نظارت کړي،چې اړمنې کورنۍ تفکیک شي او اړینې مرستې هماغو ته ورسیږي.
د سیاسي چارو شنونکی ډاکټر هاتف مختار وايي:« د ملګرو ملتونو له لوري چې د خوارځواکۍ او د ماشومانو په تړاو کوم راپور خپور شوی، بالکل پر حقیقت مبني دی. که چیرې ملل متحد غواړي،دغه مرستې اړمنوکسانو ته ورسیږي او هغو اړینو کورنیو ته ورسیږي،نو غوره دا ده،چې اسلامي امارت د ناظر په توګه په دغه پروسه کې اوسي،ترڅو اړمنو ته په سمه توګه ورسیږي.»
خو ځينې نور، ملګري ملتونه د امریکا د اقتصادي فشارونو ملګري بولي او وايي،د دلایلو په وړاندې کولو کې تکړه دي،خو پر نورو نړیوالو بنسټونو د فشار په برخه کې لټي کوي.
د سیاسي چارو شنونکی عزیز معارج وايي:« د ملګرو ملتونو سازمان د ماشومانو او اقتصادي وضعیت په تړاو اندیښنې پر ځای دي،خو ملګرو ملتونه هم د امریکا د هغو فشارونو یوه برخه ده،چې پر اسلامي امارت یې راوړي دي. ځکه دوی دلایل وړاندې کوي،خو پر نړیوالو خوراکي او نورو سازمانونو باندې غوڅ امر نه کوي.»
د ملګرو ملتونو د وروستیو اندیښنو له مخې، د ۴ میلیونو خوارځواکو ماشومانو له ډلې، ښايي روان ۲۰۲۲ کال کې له ۱۳۰ زرو زیات ماشومان د بد وضعیت له امله مړه شي.
