حکومت وايي لکه څرنګه چې تېر ۲۰۲۵ کال له سیاسي پلوه او له هېوادونو سره د اړیکو په ټینګولو کې د افغانستان لپاره مهم او له پرمختګونو ډک کال و، روان کال به هم په دې برخه کې د لا زیاتو پرمختګونو کوربه وي.
بهرنیو چارو وزات وايي، له هېوادونو سره د سیاسي اړیکو ټینګښت او تعامل تګلاره یې په دیني او ملي ارزښت ولاړه ده او په ياده برخه کې د پرمختګ پر هڅو سربېره، له ټولو هېوادونو سره د متقابل درناوي او ملي ګټو پربنسټ اړیکې ټینګول غواړي.
د بهرنیو چارو وزارت مرستیال ویاند ضیا احمد تکل وايي: « لکه څنګه چې په تېر کې د افغانستان اسلامي امارت بهرنۍ تګلاره د افغانانو پر دیني او ملي ارزښتونو متکي وه، د راتلونکي لپاره به هم د افغانستان اسلامي امارت په بهرني سیاست کې همدا اساسات او ارزښتونه خوندي وي. د افغانستان اسلامي امارت ژمن دی چې له ټولو هېوادونو سره د خپلو ملي منافعو په رڼا کې د افغانانو د هیلو خوندیتوب له مخې، مثبت تعاملات او پیاوړې اړیکې ولري او د متقابل احترام پر بنسټ ولاړ تعامل خپل کړي.»
د روان ۲۰۲۶ زېږديز کال په سره کې حکومت په نوي ډهلي کې د افغانستان سفارت ته شارژدافیر معرفي کړ او ورسره یې د سوداګرۍ ارزښت ته په کتو مسوولان ټينګار کوي چې له دې هېواد سره هم د نورو هېوادونو په څېر حسنه تعامل او اړيکې غواړي.
د اسلامي امارت مرستیال ویاند حمد الله فطرت وايي: « افغانستان غواړي د نورو هېوادونو په څېر سیمه کې له مهم هېواد هندوستان سره هم ښې اړیکې ولري. په ځانګړې توګه د افغانستان لپاره د تجارت په برخه کې چې د افغانستان د وچې مېوې ډېر صادرات هم هندوستان ته کېږي او له همدې هېواد د درملو واردات لرو، نو په همدې اساس زموږ لپاره مهم هېواد دی.»
شنونکي بیا وايي چې اړتیا ده اوسنی خارجي سیاست چې پرمټ یې روسیې د افغانستان حکومت پر رسمیت وپېژاند او تازه په هند کې د افغانستان سفارت اوسني حکومت ته ورسپارل شو، لا نور پیاوړی شي، ترڅو نړيوال قناعت وکړي او ومني چې پرمختللی او باثباته افغانستان نه یوازې د سیمې بلکې د ټولې نړۍ په ګټه دی.
د سیاسي چارو شنونکی نجیبالله جامع وايي: « باید پيل کړی بریالی سیاسي تګلاره لا غښتلې شي او نړۍ ته قناعت ورکړل شي چې یو باثباته او پرمختګ پال افغانستان د ټولو په ګټه دی. په ورته وخت کې اړتیا ده چې په کور دننه یو شمېر داسې اصلاحات راوړل شي چې هغه د نړۍ او افغانستان د خلکو راضي کولو لامل کېږي.»
باور دا دی چې له هېوادونو سره د اړیکو د ټینګښت د تسلسل ساتلو اولا پرمختګ لپاره دې یې د سیمې پر نورو مهمو هېوادونو تمرکز زیات او په ملګرو ملتونو کې دې د افغانستان څوکۍ ترلاسه کولو هڅې لا ډېرې شي.
د پوهنتون استاد فیض محمد ځلاند وايي: « باید تمرکز د سیمې په هغو هېوادونو او سترو هېوادونو وکړو چې سیمه او نړۍ کې فعال رول لري. د مشروعیت ترلاسه کولو لپاره باید د ملګرو ملتونو په سازمان کې د افغانستان څوکۍ ترلاسه کولو لپاره په ۲۰۲۶ کال حتمي هڅه وکړو.»
دا په داسې حال کې ده چې د شنبې په ورځ حکومتي سرچینو تایید کړه چې په نوي دهلي کې د افغانستان سفارت اسلامي امارت ته سپارل شوی او نور احمد نور چې په بهرنیو چارو وزارت کې یې د لومړي سیاسي رییس دنده لرله، د ياد سفارت د چارسمبالي په توګه ګومارل شوی.
تمه دا ده چې ممکن په نږدې راتلونکي کې په جاپان کې د افغانستان سفارت هم اسلامي امارت ته وسپارل شي.
